A Audiencia da Coruña prevé iniciar en setembro o xuízo polo crime de Samuel Luiz, segundo precisan fontes do Tribunal Superior de Xustiza da Galiza (TSXG) despois de comunicar tamén a decisión do alto tribunal galego de excluír comentarios policiais sobre imaxes dos documentos aos que ten acceso o Tribunal do Xurado.
O próximo 3 de xullo faranse tres anos da morte do mozo, de 24 anos, tras unha brutal malleira mentres recibía insultos homófobos no paseo marítimo coruñés á saída dun local de lecer. O caso segue á espera aínda de xuízo, con dous condenados, entón menores de idade, e outras cinco persoas, catro homes e unha muller, sen procesar.
A causa chegou ao órgano de axuizamento a principios do mes de marzo. Aínda que o cálculo inicial era que o xuízo puidese decorrer antes do verán, "e a pesar de seguir os prazos procesuais sen ningunha demora", debido á cantidade de recursos que foron presentados polas partes e aos prazos legais para a súa tramitación, "non resultará posíbel finalizar as dilixencias necesarias para a elección do xurado popular antes do verán".
A presidenta do Tribunal lembra que o sorteo dos xurados ha de realizarse como mínimo con 30 días de antelación a decorrer o xuízo e que, tras este trámite, hai que resolver as escusas que se poidan expor. "Por tanto, a previsión actual é que o xuízo comece a principios de setembro", sinala desde o alto tribunal galego.
Informes policiais
Esta previsión coñeceuse no día en que se informou tamén da decisión do TSXG de excluír do material ao que poden ter acceso os membros do xurado popular os informes realizados por axentes policiais sobre o visionado de imaxes videográficas obtidas nas inmediacións do lugar da Coruña no que faleceu, así como eliminar a chamada 'infografía forense'.
Todo iso, sen prexuízo, aclara o auto, de que os axentes da Policía Nacional que participaron na investigación poidan ser interrogados no plenario sobre estes extremos. Os maxistrados do TSXG rexeitaron, por tanto, que deban incorporarse eses informes aos testemuños, encamiñados á preparación do xuízo oral. A Sala do Civil e Penal explica que, de conformidade co artigo 34 da Lei Orgánica do Tribunal do Xurado (LOTX), ao órgano de axuizamento non se lle dá traslado da totalidade da instrución.
"Senón que só, e por medio de testemuño, daquelas dilixencias que non poidan ser reproducidas no xuízo oral". Desta forma, subliña que o contido dos ditames periciais, en canto non son susceptíbeis de ser reproducidos, "poden ser integrados no acervo probatorio a través do correspondente testemuño, sen prexuízo de que os peritos teñan a intervención que se considere no plenario".
A Sala recalca que non se pode obviar "a necesidade de que os xurados vexan por si os libros, documentos, papeis e demais pezas de convicción", á vez que reitera que les corresponde, "sen interferencia algunha", o exame das gravacións audiovisuais.
Excluídos comentarios
"Os comentarios e indicacións que sobre os mesmos leven a cabo terceiros non poden integrar o mesmo documento cando este é susceptíbel de ser apreciado polos xurados, sen que a eventual dificultade da súa consideración poida ser paliada coa introdución dos testemuños que procedan", sinalan a maxistratura.
No auto, advirten que todo iso está á marxe de que os axentes autores das dilixencias policiais de investigación poidan "comparecer no plenario e facilitar o seu testemuño e explicación merecida, ao seu xuízo, daquelas representacións gráficas e videográficas, detallando o contido da investigación policial e as súas conclusións".
O TSXG asegura que as dilixencias policiais ás que fan referencia "distan de ser infografías", pois destacan que nelas "non hai unha representación visual dunha realidade virtual, para cuxa confección si se precisarían determinados coñecementos científicos ou técnicos, senón mera glosa descritiva de determinadas imaxes".
Por todo iso, conclúe que se deben excluír do contido dos testemuños "a chamada infografía forense, en canto a mesma contén comentarios ás súas imaxes efectuados polos axentes policiais". O auto non é firme pois contra o mesmo cabe interpor recurso de casación ante o Tribunal Supremo.
