Un home foi atopado falecido na mañá desta quinta feira nas rochas da praia dos Castros, na Devesa, no municipio de Ribadeo (A Mariña). O 112-Galiza informa de que unhas persoas que se atopaban pola zona localizaron o corpo do home caído sobre as rochas da praia e deron o aviso contra as 12.20 horas. Aseguraban que estaba nun lugar de fácil acceso, xustamente á beira das escaleiras de baixada ao areal.
Segundo a información recibida pola central de emerxencias, trátase dun cidadán francés. Nestes momentos, as forzas da orde traballan para esclarecer as causas do suceso. O 112 puxo os feitos en coñecemento do Servizo de Urxencias Sanitarias da Galiza-061, da Garda Civil e da Policía Local. Así mesmo, informaron o persoal de Salvamento Marítimo e a Gardacostas da Galiza.