A asociación ecoloxista Adega recorrerá tres parques eólicos (Xeada, Orballeira e Neboada), que conforman "un único macroproxecto" de dez aeroxeradores nas serras do Courel e Valdeorras, que ameazan á última parella de aguias reais das comarcas de Quiroga e Valdeorras.
Adega ten aberta unha campaña de recadación solidaria (chamada #TiPodesParalos) para recorrer parte dos 75 parques eólicos autorizados recentemente pola Xunta da Galiza. Actualmente, supera os 52.000 euros en doazóns.
Con estas tres incorporacións, a campaña de Adega xa suma 22 recursos correspondentes a cadanseu parque eólico ao considerar que "poñen en risco o medio ambiente e o patrimonio natural galego e que son potencialmente recorríbeis".
Adega avisa de que os parques de Xeada, Orballeira e Neboada son o resultado da fragmentación "artificial" dun macroproxecto de 65 megawatts co fin de "esquivar unha rigorosa avaliación ambiental", "polo que podería tratarse dunha fraude de lei". De feito, apunta que os tres comparten infraestruturas e as súas poligonais atópanse superpostas.
Ademais, esgrime que os tres parques están promovidos por tres sociedades (Maia, Sinagra e Neiva), "radicadas en Madrid e que forman parte da mesma matriz de accionistas".
En concreto, os parques de Xeada e Orballeira proxéctanse sobre os municipios da Rúa e Vilamartín de Valdeorras e Quiroga, mentres que Neboada esténdese pola Rúa, A Pobra de Trives, San Xoán de Río (Terra de Trives), Vilamartín de Valdeorras, Quiroga e Ribas de Sil.
Suman un total de 10 aeroxeradores de 220 metros de altura que se sitúan nos límites da Rede Natura e atópanse dentro dos límites da reserva da biosfera Ribeira Sacra e Serras do Oribio e Courel.