A Dirección Xeral de Emerxencias e Interior da Vicepresidencia Segunda da Xunta da Galiza activou para esta quinta feira unha alerta laranxa por temporal costeiro nas Rías altas e Baixas.
Segundo a Axencia Estatal de Meteoroloxía (Aemet), o fenómeno meteorolóxico adverso de nivel laranxa comezará a primeiras horas da xornada da cuarta feira no noroeste e oeste do litoral da cidade da Coruña e estenderase ao suroeste por mar combinada con ondas de até seis metros.
A Mariña
Na Mariña, a alerta será amarela por mar combinada do oeste e ondas de até cinco metros.
Tamén será de nivel amarelo o aviso no litoral das Rías Altas e Baixas por ventos do suroeste de forza 7.
Extremar a seguridade
A Xunta lembra a importancia de manterse afastado da liña de costa (diques, rompentes, paseos marítimos...) e recomenda extremar as medidas de seguridade á hora de realizar calquera actividade no mar e que se revisen os cabos e amarres das embarcacións.
O Executivo galego aconsella consultar a páxina web do Centro Integral de Atención ás Emerxencias 112 (www.112galicia.org), que conta con información meteorolóxica e con ligazóns de interese.