A piques de facer 300 semanas de mobilizacións ininterrompidas por parte do seu persoal, as polémicas non cesan na TVG a respecto da cobertura electoral de cara ao 18 de febreiro. A última delas chegou no Telexornal desta cuarta feira, cando a canle pública dedicou case dous minutos a informar do vídeo de campaña do Partido Popular no que familiares e amizades falan do lado "máis persoal" do presidente da Xunta da Galiza e candidato á reelección, Alfonso Rueda.
Na peza, que recolle boa parte das imaxes promocionadas polo PP, apréciase unha voz en off que resalta varias desas características que atribúen a Rueda os seus achegados, como que é unha persoa "con moito humor", que foi educado "con bos valores" ou que no bar se comporta "como unha persoa calquera".
Desde a CUT, un dos sindicatos que representan as e os traballadores da CRTVG, afirman que se trata de "propaganda gratuíta" que non se dá no caso doutras formacións políticas. "Os vídeos 'cuquis' dos outros partidos non os vimos, non?", censuran.
👀Pssss! Vai unha de propaganda gratuita ao PP no telexornal con vídeo “cuqui” que tedes que ver do “chachi” que quedou 🤡… Os vídeos cuquis dos outros partidos non os vimos, non?😡 pic.twitter.com/1yh66YWbAJ
— CUT CRTVG (@CrtvgCut) January 24, 2024
De feito, son moitas as críticas ao escaso tempo dedicado nos programas informativos aos actos de precampaña das forzas da oposición. E a propia corporación pública decidiu deixar fóra da súa cobertura electoral a Democracia Ourensá, formación que podería ter a chave da gobernabilidade e que disputa directamente os votos ao PP na circunscrición de Ourense.
Na folla de ruta da CRTVG de cara ao 18-F, difundida por elDiario.es, prevense unha serie de entrevistas aos principais candidatos e candidatas... cuns tempos bastante desiguais que defende argumentando a representatividade actual de cada unha delas. Así, as entrevistas a Podemos e Sumar durarían 5 minutos cada unha; a do PSdeG, 9; a do BNG, 11, e a do PP, 20.
Tamén se ve reducido o tempo total de cobertura diaria da campaña, que pasa dos 370 segundos na televisión e 419 na radio dos comicios de 2020 a unicamente 260 segundos.