Esta cuarta feira o que se substanciaba no pleno do concello era o debate sobre as ordenanzas fiscais. No trámite o PP aproveitou a tensión política de fondo entre a Marea Atlántica e o PSOE e apoiou unha proposta socialista contra a suba da taxa de depuración das augas residuais. Ao ver tombada esta iniciativa, o goberno local decidiu retirar da orde do día a votación sobre os novos impostos e taxas para 2017. Todo indica que as ordenanzas que rexeron este 2016, ao non contar con apoios no pleno, serán prorrogadas para o próximo exercicio.
O BNG -en coherencia co votado por concelleiros nacionalistas na comarca, explicou a súa portavoz, Avia Veira- apoiaba a proposta de Ferreiro sobre a taxa de depuración por considerar que a tornaba "máis xusta".
O PP aproveitou a tensión política de fondo entre Marea Atlántica e PSOE e apoiou unha proposta socialista contra a suba da taxa de depuración das augas residuais
Ferreiro criticou a pinza que ao seu xuízo escenifican PP e PSOE e explicou que no proceso de negociación das ordenanzas fiscais o grupo municipal socialista exteriorizou que o único que lle importa é entrar no goberno. “Para compartir un goberno debe haber unha relación de confianza”, di o líder da Marea Atlántica, quen confesou que continúa nel aberta a “ferida” aberta após o non acordo sobre os orzamentos do concello.
Está María Pita abocada a unha moción de confianza?
Precisamente a batalla política de altura que se abre agora no horizonte é a da aprobación dos orzamentos para 2017. Non é desbotábel que Ferreiro os apresente baixo a forma dunha moción de confianza, unha manobra politicamente arriscada porque podería abrir o cenario dunha hipotética censura ao seu goberno por parte da oposición (os orzamentos aprobaríanse automaticamente se PP e PSOE non formulan unha candidatura alternativa á do alcalde).
Non parece verosímil que a Marea poda tirar adiante os orzamentos se non chegar a un acordo cun PSdeG-PSOE que vincula todo movimento á súa entrada no executivo local.