Polémica na Pobra do Brollón (Terra de Lemos) polo que se considera un uso 'partidista' da tradición máis popular na localidade durante o entroido, a festa do Oso de Salcedo. Nada máis chegar ao lugar, desde un sitio privilexiado, unha pancarta pedindo o voto para o Partido Popular daba a benvida a todas as persoas asistentes, o que espertou o malestar entre moitos veciños e veciñas e desde a corporación municipal.
O BNG e o PSdeG veñen de solicitar conxuntamente a convocatoria dun pleno extraordinario para aclarar a colocación desta pancarta do PP que consideran "irregular" pola localización e o momento. O pleno decorrerá esta quinta feira, día 15, ás 12.30 horas no Salón de Plenos do Concello, e estará aberto á veciñanza que se queira achegar.
Durante a sesión, socialistas e nacionalistas pedirán "explicacións" ante a situación vivida este pasado Luns de Entroido en Salcedo, onde a pancarta electoral en cuestión pedía de modo explícito o voto para o Partido Popular "nunha zona non autorizada pola Xunta Electoral", salientan.
A devandita pancarta foi situada nun lugar de gran visibilidade durante a celebración da Saída do Oso, "cunha clara intención de aproveitar a gran concentración de asistentes e medios de comunicación que congrega este evento".
Tanto o alcalde da Pobra do Brollón, Xosé Lois Maceda (BNG), como o líder do PSOE local, Adolfo Rubio, cualifican a situación vivida como "grave para a convivencia democrática", polo que debe ser aclarada nas canles dispostas para tal fin.
Consideran, ademais, que é "un intento de politización dunha tradición comunitaria" coa que se "falta ao respecto de moitas persoas" que ao longo do tempo e nos últimos anos traballan para manter este importante elemento do Patrimonio "independentemente das siglas políticas".
