A Fiscalía de Ourense presentou unha querela contra o alcalde, Gonzalo Pérez Xácome, pola presunta malversación de fondos públicos, pois sospeita dun posíbel destino irregular de subvencións que percibiu o seu partido, Democracia Ourensá (DO), no pasado. Neste contexto, o rexedor amosa tranquilidade mentres o PP pide agardar ao resultado deste proceso.
Os feitos que investiga o ministerio fiscal decorreron entre os anos 2015 e 2018, cando Xácome era concelleiro da oposición na corporación de Ourense.
Fontes consultadas por Europa Press confirmaron a existencia da querela que, segundo publican diversos medios, partiría dunha denuncia anónima e que investiga a xestión de case 100.000 euros da formación política.
Segundo as primeiras informacións, toma como referencia dous cheques de 20.000 e 30.000 euros retirados a nome de Pérez Xácome, cheques que o rexedor terá que explicar se foron a parar a gastos da formación ou non. Ademais, no foco estarían pagos do grupo municipal supostamente destinados a sufragar a licenza do espazo de televisión de Auria TV, a televisión do actual alcalde de Ourense.
Con todo, o tempo das transaccións é anterior a que fose elixido como rexedor municipal. A denuncia foi admitida a trámite e acordáronse dilixencias pero non hai polo momento citacións.
Transmitiu ter "preocupación cero" ante unha denuncia que considera "sen base" e que "como as anteriores" prevé que "quedará en nada".
Reaccións no resto de partidos
O primeiro partido en trasladar a súa valoración á querela foi o BNG. Os nacionalistas aseguran "celebrar a decisión de Fiscalía" e afirman que "desde hai anos advírtense estas prácticas das que o propio Xácome presumiu".Consideran que a querela dana "profundamente a imaxe da institución" á vez que "contribúe á desafección dos veciños polo seu concello", que consideran "sumido no caos e na inacción".
Ademais desde o BNG lembraron ao PP que en agosto do 2020 abandonaron o goberno local baseándose en denuncias presentadas por ex compañeros do partido e, agora, é a propia Fiscalía "quen acusa ao rexedor de malversación de fondos públicos".
Pola súa banda, o socio de goberno, o PP, manifestou o seu "firme respecto aos procesos xudiciais e á presunción de inocencia" exixindo que se deixe traballar á xustiza.
