Antes de ter lugar a Conferencia organizada pola Fundación Galiza Sempre, a delegación de Cuba que visita hoxe a capital do País, reuniuse con membros do BNG, entre os que se atopaban o voceiro nacional, Guillerme Vázquez, a secretaria de organización Montse Prado e o voceiro municipal da fronte, Rubén Cela.
O acto, que leva por lema Cara onde vai Cuba?, desenvolverase hoxe ás 20.00h na Biblioteca Ánxel Casal -Avenida Xoán XXIII, e contará coas intervencións de Fernando Martínez Heredia, Director Xeral e Investigador Titular no Instituto Cubano de Investigación Cultural Juan Marinello da Habana; e Alberto Betancourt, Vicepresidente da Asociación Nacional de Economistas.
A conferencia repasará os máis de cincuenta anos dende o trunfo revolucionario, así como a loita e solidariedade amosadas polo pobo de Cuba ao longo deste período. Así mesmo, a delegación cubana, achegará as liñas máis importantes das reformas económicas iniciadas polo goberno nesta nova etapa e as consecuencias do bloqueo imposto polos EUA dende 1962.
O acto será presentado por Xesús Veiga, presidente da fundación nacionalista.
