As estruturas provinciais do Partido Popular da Galiza renovarán os seus órganos de dirección na segunda e terceira semana de setembro, nuns congresos onde serán reelixidos Diego Calvo, Elena Candia, Alfonso Rueda e José Manuel Baltar. Malia a aparente unanimidade dos conclaves, marcados pola ausencia de listas alternativas, o malestar entre parte da afiliación popular é evidente. Se diferentes alcaldes ourensáns se queixan da falla de atención de Baltar ás demandas dos seus concellos, a maioría dos militantes vigueses critican o liderado de Rueda e o excesivo peso da agrupación pontevedresa. O descontento tamén aniña nas comarcas coruñesas cos métodos de dirección do equipo de Calvo, pero en ningúns destes territorios a desafección é tan grande como en Lugo.
Elena Candia continuará como presidenta do PP en Lugo durante catro anos máis, pero co partido fendido. A antiga alcaldesa de Mondoñedo e actual parlamentaria no Hórreo chegou á xefatura dos populares lugueses en 2016, tras derrotar no congreso a candidata de Feixoo, a deputada Raquel Arias, grazas ao apoio do senador José Manuel Barreiro e do parlamentario José Manuel Balseiro, home forte do aparato do partido e patrocinador da candidatura.
Precisamente, a sintonía política entre Balseiro e Candia deteriorouse de maneira progresiva nos últimos anos, introducindo novos elementos de tensión no partido e reducindo a base de apoio interno á presidenta dos populares lugueses. Sexa cal for a causa real desta ruptura, a afiliación do PP, maioritariamente, achácaa a unha loita polo poder entre ambos e desbota motivacións de tipo ideolóxico.
O malestar dunha parte dos alcaldes con Candia é evidente. Malia que os rexedores do PP de Lugo, agás José Ángel Santos de Friol, adoitan falar das cuestións orgánicas pola boca pena, as críticas a Candia repítense nos grupos municipais e nos comités locais de norte a sur da circunscrición.
Os próximos á presidenta restan importancia ás mesmas e responsabilizan destas opinións as xentes de Balseiro e, en menor medida, os afíns a Raquel Arias. Mais algúns dirixentes doutras familias do partido acusan Candia de falla de atención ás demandas dos concellos e das agrupacións locais e de dividir a formación. “Elena ve pantasmas onde non os hai”, sinala un veterano do PP preocupado pola crispación interna, pero satisfeito pola decisión de Candia de integrar Balseiro na nova dirección.
A proba definitiva para Candia serán as eleccións locais de 2023. O PP chega ás mesmas tras recoller en 2019 os peores resultados na circunscrición desde os comicios de 1979 e co seu poder local reducido a mínimos, após ser apartado nos últimos procesos do Goberno da Deputación e dos principais núcleos de poboación.
Neste escenario, o grupo de dirección dá por feito un avance nas eleccións, se ben considera moi complicado recuperar a Deputación, a alcaldía de Lugo ou o Goberno de vilas como Monforte e Viveiro. Afiliación popular considera que Candia está diante do seu último mandato como presidenta do PP e que o futuro do partido pasa por outros nomes, como o delegado da Xunta en Lugo, Javier Arias, ou o portavoz na Deputación, Javier Castiñeira.