O Pazo de Fonseca de Santiago reuniu na mañá desta sexta feira representantes do tecido hostaleiro e social da cidade, así como de diferentes institucións de Catalunya, Porto, Málaga e Sevilla para debater arredor da posíbel aplicación dunha taxa turística e outras iniciativas que permitan acadar un "modelo turístico sustentábel" en lugares sometidos a unha presión turística elevada, "como é o caso de Santiago de Compostela", salientan desde o Goberno de Goretti Sanmartín. A alcaldesa abriu a xornada defendendo a necesidade de definir un novo modelo turístico "que sexa compatíbel coa vida das persoas que vivimos e traballamos aquí".
A rexedora compostelá deu a benvida ás e os participantes dunha xornada na que se presentaron diversos casos de aplicación da taxa turística e outros instrumentos de xestión noutros lugares da península, co obxectivo de promover un "turismo de calidade", e salientou que se trata dunha "grandísima oportunidade para mudar a situación actual", así como "un dos maiores retos que temos por diante".
O compromiso do Goberno municipal, reiterou Sanmartín, é seguir a traballar por "planificar o turismo como unha actividade que achegue valor ao conxunto do concello e que sexa, polo tanto, compatíbel e enriquecedor da vida da veciñanza". "Sabemos que mudar o modelo que existe non se logra dun día para outro, pero o noso obxectivo é traballar en parámetros de calidade para que o número de visitantes deixe de ser o máis importante e pase a selo os beneficios que todo este turismo xera para a nosa cidade e para Galiza", engadiu.
Así, a alcaldesa defendeu a aplicación da taxa turística como unha forma de "reequilibrar o custo de ser un dos destinos máis cobizados deste país que rexistrou, segundo datos oficiais do pasado ano, máis de 1,5 millóns de pernoctas, máis de tres millóns de viaxeiros e viaxeiras no aeroporto Rosalía de Castro e máis de 400.000 compostelas entregadas na Oficina do Peregrino, cifras que nos meses que levamos de 2023 xa sabemos que imos superar a final de ano".
Na clausura da xornada, a concelleira de Turismo, Míriam Louzao, defendeu tamén a necesidade de aplicar a taxa turística na cidade xa que se trata dunha "ferramenta moi valiosa que permitirá que o propio modelo turístico actual conte con maiores recursos para ese cambio que precisamos", permitindo a "redistribución dos recursos que produce o turismo entre o conxunto da veciñanza". Tamén destacou a partir do exposto durante a xornada que "como está comprobado nos múltiples destinos que xa contan con esta ferramenta, a taxa turística non ten un impacto na demanda".
3 eixos de traballo
A xornada O impacto turístico nas cidades. Taxa turística e outros instrumentos de xestión organizouse no marco do Plan de turismo sustentábel no que participan o Concello de Santiago, a Xunta da Galiza e o Ministerio de Industria, Comercio e Turismo. O foro estruturouse en tres grandes eixos.
No primeiro, enfocado en ofrecer unha visión técnica da aplicación taxa turística, participaron o catedrático de Dereito Financeiro e Tributario da USC, César García Novoa, autor ademais do estudo sobre a implantación deste tributo en Santiago de Compostela, e a directora xeral de Tributos da Generalitat de Catalunya, Natalia Caba i Serra, onde se leva aplicando este tributo desde o ano 2012.
No segundo eixo deuselle voz ao ‘ecosistema’ socioeconómico da propia cidade, nunha mesa redonda moderada pola vicedecana da Facultade de Xeografía e Historia da USC, Mª José Piñeira Mantiñán, na que participaron o vicepresidente de Unión Hotelera, José Antonio Liñares; o presidente de Hostaleria.gal, Lois Lopes; a presidenta da Asociación de Hostelería de Compostela, Sara Santos; a presidenta da Asociación de Bares, Pubs e Discotecas de Santiago, Lucía Vázquez; a presidenta da Asociación Veciñal A Xuntanza, Mon Vilar, e o presidente da Asociación de Veciños da Cidade Histórica Fonseca, Roberto Almuíña.
O terceiro eixo estivo centrado na pegada do turismo nas cidades e contou coas intervencións do director de Turismo do Concello de Barcelona, Xavier Suñol Ferrer; a vereadora de Turismo e Internalización da Cámara Municipal de Porto, Catarina Santos Cunha; o senador e portavoz do grupo Socialista no Concello de Sevilla, Antonio Muñoz Martínez; e o director xeral de Turismo e Promoción do Concello de Málaga, Jonathan Gómez Punzón.
