Formoso dubida do impulso que poida dar a Galiza unha Xunta con poucas caras novas

O líder dos socialistas galegos téndelle a man ao novo Goberno de Rueda e anímao a tomar nova etapa "con impulso e con ansias de cambio de ritmo".
O secretario xeral do PSdeG, Valentín González Formoso, nun acto hoxe en Ponteceso (Foto: PSdeG).
photo_camera O secretario xeral do PSdeG, Valentín González Formoso, nun acto hoxe en Ponteceso (Foto: PSdeG).

O secretario  xeral do PSdeG, Valentín González Formoso, considera que non será fácil que a Galiza colla "impulso" cunha Xunta na que "se cambian tan poucas caras", en alusión á nova composición do Goberno galego

Con todo, asegura que os socialistas lle darán "unha marxe de confianza" e tenderanlle a man ao novo Executivo, liderado por Alfonso Rueda.

"Por encima de todo tenderémoslle a man, porque entendemos que por encima de intereses partidistas están os intereses da Galiza", destacou o socialista en Ponteceso tras facerse público o novo equipo da Xunta da Galiza.

O novo presidente, Alfonso Rueda, nomeou este sábado o seu primeiro Gabinete, no que ascende a Francisco Conde, que manterá as áreas económicas, a vicepresidente primeiro.

Ademais, Diego Calvo entra como vicepresidente segundo e herda as funcións que tiña o máximo mandatario autonómico até a marcha de Alberto Núñez Feixoo.

O resto das consellarías permanecen sen cambios, quitando algunha nova denominación ou o traslado das competencias de Turismo, que pasan a depender directamente da Presidencia.

González Formoso pediulle a Rueda que colla a nova etapa "con impulso e con ansias de cambio de ritmo", e ao novo Goberno "compromiso" coa Galiza e que estea "á altura" dos galegos e dos retos actuais que deberá afrontar, nun contexto socieconómico "moi difícil", recoñeceu.

A INFORMACIÓN GALEGA ESTÁ NA TÚA MAN!

Subscríbete ao noso boletín de novas.

Date de alta de balde e recibirás unha selección dos nosos artigos para saberes o que acontece.

comentarios