A presidenta do PP de Vigo, portavoz municipal e vicepresidenta da Deputación de Pontevedra, Marta Fernández-Tapias, confirmou esta sexta feira que deixará a política local tras as eleccións galegas do 18 de febreiro.
Cunha concisa mensaxe na rede social X, Fernández-Tapias confirmou que, tras os comicios galegos, iniciará "unha nova etapa”. "Aposto pola miña vida persoal e iso correspóndeme a min", expón na súa mensaxe.
Muy mal le tiene que ir al PSOE para esto. De lo que toca hablar es del futuro de Galicia. No respetan nada ni nadie. Apuesto por mi vida personal y eso me corresponde a mí. Efectivamente, abriré una nueva etapa tras ganar las autonómicas al PSOE en Vigo y con Rueda de presidente
— Marta Fdez-Tapias (@martaftapias) February 2, 2024
A portavocía de Fernández-Tapias chegou en 2021, nun momento de clima de división interna no PP de Vigo. A súa candidatura, apoiada polo sector máis próximo ao presidente galego, Alfonso Rueda, e ao se predecesor, Alberto Núñez Feixoo, venceu por 68 votos á do seu contrincante, Javier Guerra, entre acusacións de ter inflado o censo de afiliación. A presidenta do PP de Vigo estaba chamada a frear tanto a división interna no partido como a “sangría” de votos dos populares na cidade olívica, tras pasar de 13 edís en 2011 a 4 en 2019.
O seu nome soaba tamén entre as principais candidatas do Partido Popular para presidir a Deputación de Pontevedra, logo de que PSOE e BNG perderan nos comicios de 2023 os mandos da entidade provincial. Con todo, a presión das Alcaldías populares do interior fixo a Luís López ‘Lugués’ gañador, ficando Fernández-Tapias coa Vicepresidencia, que agora tamén deberá abandonar, ao ir ligado o cargo á súa acta de edil.
“Ausencia de interese por Vigo”
Tapias censurou tamén que fose o PSdeG o que se adiantara para dar a coñecer esta decisión, cunhas declaracións da vicesecretaria xeral do partido en Vigo, Yolanda Aguiar, remitidas aos medios e nas que afeaba a marcha de Fernández-Tapias por "intereses afastados do que significa Vigo".
“Despois das eleccións galegas, a responsábel e candidata do Partido Popular de Vigo, a señora Fernández-Tapias, abandonará a política local”, adiantaba Aguiar nunha mensaxe de audio. “Nunca tivo a Vigo entre as súas prioridades e, desde logo, esta decisión non vén máis que a confirmar a ausencia total de interese da señora Fernández-Tapias e do Partido Popular de Vigo por esta cidade e pola súa cidadanía. Os intereses da señora Tapias son outros”, criticaba a vicesecretaria xeral do partido en Vigo, para a continuación facer referencia á “enésima crise interna” dos populares vigueses.
“Líos, internos, problemas orgánicos, división, excisións, iso é ao que se dedica o Partido Popular de Vigo”, critica Aguiar.
"Moi mal lle ten que ir ao PSOE para isto. Do que toca falar é do futuro da Galiza. Non respectan nada nin a ninguén. Aposto pola miña vida persoal e iso correspóndeme a min", sinalou a aínda presidenta do PP vigués en X. "Efectivamente, abrirei unha nova etapa tras gañar as galegas ao PSOE en Vigo e con Rueda de presidente", conclúe a súa mensaxe.
“Sen proxecto” para Vigo
Pola súa parte, o portavoz do BNG no Concello de Vigo, Xabier P. Igrexas, sen entrar a valorar “nin as decisións, nin as crises internas doutras organizacións políticas”, quixo lembrar que “que o PP non tiña proxecto para Vigo non é ningunha sorpresa”.
O BNG nunca entramos a valorar nin as decisións, nin as crises internas doutras organizacións políticas.
— Xabier P. Igrexas #VigoMáisAlá (@contradiscurso) February 2, 2024
Que o Partido Popular non tiña proxecto para Vigo non é ningunha sorpresa. Levan moitos anos limitándose a actuar como franquicia xustificando as políticas de castigo e…
Nunha mensaxe na rede social X do concelleiro, o nacionalista criticou que os populares “levan moitos anos limitándose a actuar como franquicia xustificando as políticas de castigo e abandono que aplicaron desde a Xunta, antes Feixóo e agora Rueda, en contra das viguesas e dos vigueses”. “O importante non é a onde marche a señora Tapias, senón que o voto decisivo de Vigo vai lograr desaloxar a Rueda da presidencia da Xunta”, concluíu Igrexas.