A sucesión de Núñez Feixoo eleva a tensión interna no PP da Galiza

Feixoo arranca hoxe en Compostela a súa campaña para liderar o PP no Estado

A reunión da Xunta Directiva estatal do Partido Popular respondeu ao guión. Mentres Pablo Casado se despedía da Presidencia afeando aos dirixentes da formación o trato recibido, os baróns territoriais tomaban posicións para unha nova etapa. Feixoo reúnese hoxe coa dirección do partido na Galiza, no que xa é considerado como o primeiro acto da súa campaña interna para liderar o PP.

A presidenta da Comunidade de Madrid, Isabel Díaz Ayuso; o presidente da Rexión de Murcia, Fernando López Miras; o de Andalucía, Juanma Moreno, e o da Galiza, Alberto Núñez Feixoo, esta terza feira, na Xunta Directiva Nacional do PP (Foto: duardo Parra / Europa Press).
photo_camera A presidenta da Comunidade de Madrid, Isabel Díaz Ayuso; o presidente da Rexión de Murcia, Fernando López Miras; o de Andalucía, Juanma Moreno, e o da Galiza, Alberto Núñez Feixoo, esta terza feira, na Xunta Directiva Nacional do PP (Foto: duardo Parra / Europa Press).

O camiño de Núñez Feixoo cara a Madrid está despexado. O propio Pablo Casado, tras presumir na súa intervención de ter a "conciencia tranquila e sen remorsos" e reprochar unha "reacción que sinto que non merecía", afirmou o seu apoio ao dirixente galego e mesmo ofreceuse a seguir ocupando responsabilidades políticas no novo período. Porén, esa circunstancia semella complicada unha vez que Isabel Díaz Ayuso, chamada a xogar un papel chave no partido nos vindeiros anos, defendeu, publicamente, a expulsión do PP daquelas persoas que fixeron parte dunha "campaña" contra ela.

Alberto Núñez Feixoo volveu amosar onte a súa sintonía coa presidenta madrileña. A ese respecto, indicou que "é a presidenta do PP e por conseguinte é unha persoa honorábel que imos defender porque cremos na súa honorabilidade e non nos presenta dúbidas a súa honorabilidade", redundou. Na mesma liña, cualificouna como "un activo indispensábel" da organización e deixou caer o seu apoio para dirixir a formación conservadora en Madrid.

Xunta Directiva do PP

A realización na tarde de hoxe da Xunta Directiva do PP galego significa o punto de arranque para o lanzamento formal da candidatura de Feixoo. A este respecto, o presidente da Xunta sinalou que "imos falar co PP e ver desde a Galiza como podemos axudar e comprometernos ante a situación actual do partido, e cando os escoite dirixireime aos compañeiros do PP galego e de todo o Estado, e máis importante, ao conxunto dos españois, para trasladar a decisión onde corresponde".

"Chegou o momento de que os afiliados falen, con nitidez, con liberdade e sen presións, e co único obxectivo de acertar. Empezou un Congreso extraordinario e urxente do partido; extraordinario porque a situación orgánica do partido así o requiría, e urxente porque temos que resolvela e pórnos ao dispor do noso país", aseverou Núñez Feixoo, que deu este paso coa certeza de contar co apoio dos principais dirixentes territoriais da organización.

Núñez Feixoo debe resolver a sucesión á fronte do PP da Galiza ao mesmo tempo que prepara a súa saída para Madrid. Os estatutos do Partido Popular, aprobados no seu XVIII Congreso estatal, decorrido en xullo de 2017, estabelecen como incompatíbel exercer ao mesmo tempo a Presidencia estatal do partido e idéntica responsabilidade nunha organización territorial, sexa de carácter local, provincial ou autonómica. Así, no caso de ser Feixoo elixido presidente da formación no vindeiro congreso dos populares de 2 ou 3 de abril, algo que dan por feito na organización, debe renunciar ao cargo que actualmente ostenta como máximo responsábel dos populares galegos.

Un partido en mans dos baróns

O Partido Popular realizará, finalmente, o seu XIX Congreso o vindeiro 1 e 2 de abril en Sevilla. A cita de onde Feixoo sairá nomeado líder da formación no Estado apunta cara a unha organización con máis poder dos baróns territoriais e menos centralizada en relación coa época de Pablo Casado.

Neste liña, é significativa a composición da comisión organizadora do conclave, con representación das diferentes organizacións territoriais, adiantando un esquema de dirección que con case total seguridade se confirmará a partir de 1 de abril.

Ao tempo, agárdase unha volta á primeira liña da 'vella garda' do equipo do ex presidente Mariano Raxoi, como avanza a presenza de secretario da comisión organizadora do congreso, Juan Carlos Vera, un dos mais veteranos 'fontaneiros' de Xénova, xubilado no ano 2018 por Casado.

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios