Tras os últimos casos de imputación en delitos de corrupción de cargos políticos de varias cidades galegas, varias son as iniciativas que pretenden respostar á preocupación cidadá por este tema. Deputad@s de BNG e AGE solicitaron a demisón d@s imputad@s e agora Compromiso por Galicia (CxG) presentou no rexistro do Parlamento a tramitación dunha ILP con medidas de prevención destes casos. Con este primeiro paso legal, conforme o disposto no artigo 4 da Lei 1/1988, do 19 de xaneiro, CxG quere "respostar a unha preocupación da cidadanía", en palabras do seu secretario xeral, Xoán Bascuas.
A iniciativa de CxG ten como referentes, segundo figura no propio texto, outras semellantes doutros lugares do mundo como o caso da ficha limpa da lexislación brasileira. "Cumprimos os trámites legais para comezar a recoller cando menos as 15.000 sinaturas precisas para a toma en consideración no Pleno e subseguinte tramitación parlamentaria”. O secretario xeral de CxG deixa claro que esta ILP non pretende "resolver, castigar ou sancionar, senón prever".
Báscuas aposta polo endurecemento do castigo para @s corrupt@s e unha "exemplaridade na conduta nos representantes políticos galegos, e unha actuación pedagóxica orientada ao cambio dunha cultura política enormamente instalada no imaxinario colectivo". Após a presentación no rexistro da proposta debería acadar as 15.000 sinaturas para a súa toma de consideración no Pleno do Parlamento.
A ILP
No texto rexistrado por CxG preséntanse os motivos polos que se realiza esta proposta e enuméranse, no seu artigo premiliminar, aquelas "actividades de risco que podan incitar" a diversos delitos de corrupción. Logo sinálanse formas de actuación nos procesos electorais galegos, na dación de contas d@s representantes públicos, na limitación de mandatos, na contratación de servizos públicos e, por último, propón a creación dun Consello de Prevención da Corrupción.
Imaxe: CxG
