Algúns dos contratos da Xunta para a promoción do Xacobeo espertaron a polémica. O grupo parlamentario socialista na Cámara galega, a través dos seus deputados Pablo Arangüena e Paloma Castro presentou unha pregunta ao Goberno galego acerca desta situación.
Na pregunta, á que tivo acceso Nós Diario, os socialistas aseguran que “segundo figura no portal de transparencia da Xunta, a Axencia de Turismo da Galiza contratou a empresa periodística de Javier Negre en tres ocasións inmediatamente antes da partida do ex presidente da Xunta, o señor Alberto Núñez Feixoo, a Madrid como máximo dirixente do PP a nivel estatal”.
“En concreto, formalizáronse tres contratos (por importes de 17.995€, 15.110€ e 16.985€, que sumados ascenden a 50.000€ IVE incluído), sendo adxudicados o primeiro deles o 8 de abril de 2022 e os outros dous o 24 do mesmo mes, 5 días antes da dimisión de Feixoo como presidente da Xunta”, inclúen na pregunta.
En declaracións a Nós Diario, o propio Pablo Arangüena sinala tres cuestións polas que o seu grupo parlamentario considera irregular o contrato coa empresa de Javier Negre.
“En primeiro lugar está o carácter do medio xa que só ten tres anos de vida, é marxinal e é propiedade dun xornalista que foi condenado catro veces por difamar e difundir mentiras”, asegura Arangüena.
En segundo lugar, o deputado manifesta que “é unha irregularidade fraccionar tres contratos por un valor total de 50.00 euros. Isto fano para que sexan contratos menores e non ter que dar explicacións sobre eles”.
Finalmente, Arangüena apunta que “outra irregularidade que destacamos é que, aparentemente non hai servizo. O único que se encontra son algúns vídeos curtos feitos polo propio Negre co seu teléfono facendo algún tramo do camiño. Iso non xustifica 50.000 euros”.
Un medio de extrema dereita
Ademais de se tratar dun medio “marxinal”, en opinión de Arangüena a situación agrávase ao ter en contra que o medio que Negre dirixe é de “extrema dereita”.
“Javier Negre é un axitador da extrema dereita. Unha persoa que se dedica difundir bulos e barbaridades”, engade o deputado socialista.
