A concelleira de Ribeira Tania Redondo denuncia insultos e ataques persoais por parte da candidata do PP na moción de censura
Tania Redondo, desde hoxe concelleira non adscrita no Concello de Ribeira, compareceu esta quinta feira para denunciar publicamente as coaccións do Partido Popular para forzar o seu apoio á moción de censura ao alcalde nacionalista do municipio, Luís Pérez Barral.
Redondo, elixida nas urnas como candidata do Partido Barbanza Independente (PBBI), reivindicou o compromiso co "cambio" que levou a súa formación a entrar no Goberno local de Ribeira, un tripartito encabezado polo BNG co apoio do PSdeG. "Desde o meu partido insistimos en que nunca pactariamos co goberno do PP que estaba naquel momento no poder", dixo.
A concelleira deu conta das dificultades que o novo Goberno atopou nos inicios do seu mandato, "unhas contas desastrosas e practicamente baleiras que, incluso, rozaban a ilegalidade e nos impedían traballar como nos gustaría". En dous anos de goberno describiu desacertos e discrepancias, máis por riba de todo "diálogo" cun "mesmo obxectivo", dixo, "solucionar e traballar xuntos polo ben do nos concello".
Moción de censura
Un obxectivo frustrado pola moción de censura presentada polo Partido popular o pasado 29 de setembro co apoio de tres edís do PBBI, unha moción "froito de meses de negociacións e reunións ás miñas costas, onde se xogaba o futuro de Ribeira sen transparencia nin lealdade por parte de tres compañeiros do meu partido", precisou.
Tania Redondo sae agora ao paso destes movementos para destapar o que ela denominou "efecto sorpresa", a "aparición" como "heroes" dos mesmos "que nos puxeron pedras no camiño e que hoxe se presentan como salvadores dos mesmos problemas que eles crearon".
A concelleira apuntou directamente á candidata do PP na moción de censura, Mariola Sampedro, sen nomeala. "Unha señora que me faltou ao respecto publicamente con insultos cara a miña persoa".
Ataques persoais
Redondo apuntou ataques persoais doutros membros do PP de Ribeira, "xente que fai da política unha loita persoal, facéndome sufrir non só a min, senón a toda a xente que me rodea, xulgando o traballo da miña familia e poñéndoo en dúbida constantemente con ataques directos".
"Esta non é maneira de traballar", resumiu a concelleira antes de rexeitar "compartir goberno con estas persoas, por principio, e por respecto á miña familia e sobre todo por respecto a min mesma".
Tania Redondo rematou a súa comparecencia anunciando a súa renunica como concelleira do PBBI e o seu paso ao grupo non adscrito. "Nunca entrei no seu xogo de ataques persoais e non penso facelo agora. Nunca traballei así e non o farei no futuro", concluíu.
