A portavoz nacional do BNG, Ana Pontón apelou en Ribeira á forza das mulleres, "esa forza que move o mundo".
Pontón tamén aludiu ao humor como "arma de construción masiva" e para construír futuro, pois, dixo, “é preciso cambiar de rumbo”. “Ese e o cambio que propón o BNG para Ribeira con Luís Barral liderando o próximo goberno municipal a partir do 28 de maio”, apostilou.
A líder do BNG insistiu en que para obter resultados diferentes “non podemos facer sempre o mesmo, e en Ribeira urxe dar ese cambio”.
“Luís –o candidato nacionalista-, aínda non nacera e xa gobernaba o Partido Popular, e o resultado despois de 33 anos de desgobernos da dereita están á vista de todos e de todas”, dixo.
Na súa intervención, tamén criticou que o PP diga que o candidato do BNG á alcaldía é moi novo: “Eu quero dicirlle ao Partido popular que a mocidade galega lles molesta moito, e por iso fixo todo o posíbel para que 200.000 mozos e mozas colleran a maleta cara a emigración nos últimos anos”.
“En Ribeira -reiterou Pontón- a única alternativa ao de sempre é un goberno liderado polo BNG, con Luís Barral como alcalde, a partir do 28M. Toca facer algo diferente”.
A maiores, definiu Barral como “un gran candidato” que conta “cun proxecto serio e solvente coa man tendida para transformar esta cidade en positivo, a favor das persoas".
“Aos veciños e as veciñas ofrecémoslle un modelo municipal de éxito, que funciona, como demostramos nas vilas e cidades que lideramos desde os gobernos municipais”, concluíu.
