A cultura galega volve do exilio: Amparo López Jean

Rita Amparo López Jean naceu en Vilaboa (Culleredo) o 30 de outubro de 1885. Era filla de Adela Cruz Ramona Jean Toca e de Sabino María López Núñez. Os pais casaran o 14 de febreiro de 1880 en Vilaboa. Adela, natural de Pamplona, que se formara como mestra en Cuba, a onde marchara de nena acompañando o seu pai, militar de profesión, era nese momento viúva, e exercía na escola de nenas de Vilaboa dende febreiro de 1875. O seu proxenitor, tamén viúvo da súa primeira esposa, Concepción Marzoa, coa que tivera, polo menos, tres fillos (José, Filomena e Juana), foi concelleiro en Culleredo, secretario dese Concello durante moitos anos e, posteriormente, do de Oza. Ademais, tiña diversos negocios, levou a administración de lotarías de Culleredo e posuía numerosos predios. Faleceu o 7 de marzo de 1899 e está soterrado no cemiterio parroquial de Vilaboa.