Esta quinta feira, a ministra de asuntos constitucionais do Goberno de Xamaica, Marlene Malahoo Forte, revelou que o seu país quere facer un referendo en 2024 para saír da Commonwealth e converterse nunha república.
Segundo as declaracións de Malahoo, a intención é levar a cabo un referendo “urxente” o vindeiro ano. Así, Xamaica independizaríase da monarquía británica e tería o seu propio presidente ou presidenta xa en 2024.
“Mentres no Reino Unido se celebra a coroación do rei, Xamaica trata de escribir unha nova constitución... que servirá para cortar lazos co monarca como xefe do noso estado”, manifestou a ministra nunha entrevista.
“Agora é o momento”
Malahoo mostrouse convencida de que “agora é o momento” e que Xamaica está “en mans dos xamaicanos e das xamaicanas”. A ministra afirmou que o seu Goberno “di que o temos que facer agora: é a hora de dicir adeus!”.
Fontes do Goberno recoñecen que o calendario é “ambicioso”, porque tamén teñen que seguir uns pasos parlamentarios que “probabelmente comecen este mesmo mes”, após a coroación de Carlos III.
Falta de identificación co monarca
Entre as razóns que alega o pobo xamaicano para cortar coa monarquía británica hai unha “falta de identificación con Carlos III”, algo que non acontecía coa raíña Isabel II, así como a vontade de ter outra forma de goberno.
Moitos xamaicanos e xamaicanas sentían afecto pola raíña, que aínda estaba no trono cando Xamaica se independizou. Porén, ese afecto non existe co rei Carlos: “é un estranxeiro para nós”.
