Nun último esforzo negociador, o ministro da Presidencia, Félix Bolaños, e o secretario Xeral do PP, Teodoro García Egea, estabeleceron o pasado mes de outubro un novo diálogo para renovar os órganos constitucionais cuxo mandato vencera. E así o lograron co Tribunal Constituciona, o Tribunal de Contas ou o Defensor do Pobo, pero o CXPX é a peza que segue pendente.
O impedimento para ter un acordo neste estamento é o sistema de elección dos doce vogais procedentes da quenda xudicial.
O PP reclama que se modifique a lei como primeiro paso para que os xuíces sexan elixidos polos propios xuíces. Logo procederíase á renovación.
No entanto, o Goberno do estado español non fecha a porta a esa reforma normativa pero pensa que a orde correcta para afrontala é fechar inicialmente os cambios no Poder Xudicial.
Con estas posturas, as fontes próximas á negociación que foron consultadas por Europa Press non ven posíbel que vaia haber un achegamento das posturas que permita a renovación antes de que finalice o ano.
Malestar da xudicatura
Así se presenta o feche de 2021 a pesar de que o presidente do CXGX e do Tribunal Supremo (TS), Carlos Lesmes, volveu denunciar, con motivo da apertura do ano xudicial o pasado 6 de setembro, a "insostíbel" situación do órgano de goberno dos xuíces, instando ás forza políticas a que deixen este asunto fóra de loita " partidista" para avanzar.
Lesmes alertou de que a falta de renovación non é só un problema para a xudicatura, senón tamén para o conxunto da sociedade española, xa que "foi deseñado pola propia Constitución para garantir a independencia no exercicio da función xudicial".