Até seis membros das forzas públicas colombianas foron liberados polo Exército de Liberación Nacional (ELN) no departamento de Arauca, informou a Defensoría do Pobo, explicando que nunha misión humanitaria onda a Igrexa católica entregáronlles dous suboficiais e tres soldados das Forzas Armadas, así como un integrante da Policía.
“As liberacións recíbense como unha mostra de boa vontade do ELN fronte a unha eventual mesa de negociación co Goberno de Gustavo Petro”, apuntaron as autoridades araucanas tras a liberación. Os capturados levaban entre un e dous meses retidos.
Entrementres, a guerrilla trasladou nun comunicado recollido por El Tiempo que valoran a vontade do novo Executivo colombiano de “recoñecer os anteriores compromisos do Estado e garantir as medidas políticas e xurídicas que permitan reactivar as conversas na procura da paz con transformacións e xustiza social”.
A nova chegou pouco despois dunha intervención pública do presidente Gustavo Petro na que reclamaba unha tregua ás organizacións armadas, facendo fincapé na “gravidade da situación que se aveciña”, en referencia á vaga de chuvias que se agarda no país, agudizadas polo fenómeno da Niña. Se toca “salvar xente, que terríbel sería que, ademais, o cruce dos disparos impedise os labores [de axuda] en moitas rexións”, asegurou.
Cara ás conversas de paz
Desde que a finais da semana pasada, os ministros de Exteriores de Cuba, Bruno Rodríguez, e de Colombia, Álvaro Leyva, fixeran público na Habana a decisión de reiniciar o diálogo entre o Estado e o ELN, os feitos precipitáronse, e apenas fica pendente saber a data exacta na que comezarán as conversas, bloqueadas desde 2019.
Un día despois, o Alto comisionado para a paz do Goberno de Colombia, Danilo Rueda, ratificaba que o gabinete de Petro recoñecía oficialmente a lexitimidade da delegación da guerrilla, que xa se atopaba na capital cubana.
Após o primeiro contacto, a delegación gobernamental indicou que o “ELN dará os pasos precisos para volver á mesa de negociación”, unha vez constatado que “comparte a vontade de paz do Goberno”.
A comezos desta semana, foi directamente o líder do ELN, Antonio García, quen sostiña que “as partes coincidimos na necesidade de reiniciar un proceso de diálogo con feitos que demostren á sociedade colombiana e ao mundo que esta vontade é real”, satisfeito da predisposición do Goberno de Petro de “iniciar o camiño para a reactivación das conversas”.
O plan do novo gabinete abarca non só ao ELN, senón a múltiples actores armados que operan no territorio. Antes da investidura, o mandatario debullou que, mentres nalgúns casos as negociacións terán un carácter político, na meirande parte será un diálogo en termos xudiciais.
Porén, canto menos no que atinxe ao ELN, o comezo das conversas está moi perto, transmiten as autoridades colombianas. “Saiban que hai un pobo agardándoos de brazos abertos, disposto a rodealos e apoialos na loita por rematar co conflito armado”, trasladou á guerrilla o antigo comandante das Forzas Armadas Revolucionarias de Colombia (FARC) e secretario xeral da formación herdeira, Comúns, Rodrigo Londoño.
Paramilitares e narcotraficantes buscan diálogo
Xa antes de que Petro tomara posesión o 7 de agosto como novo presidente do país, 40 agrupacións armadas de paramilitares e narcotraficantes asinaron un documento no que propuñan a Petro un cesamento á violencia para iniciar un diálogo de paz. O primeiro en tomar a iniciativa foi o Clan do Golfo, o máis importante grupo paramilitar e narcotraficante de Colombia, que declarou unha tregua poucos minutos despois de comezar o acto de investidura de Petro.
A principal petición destes grupos é que se impida a extradición dos seus membros. Con todo, a diferenza das negociacións co ELN, a opinión pública está máis dividida nestes casos, onde xornais como El Espectador exixen "sometemento" e non negociación. Amais, tamén quedan pendentes neste proceso as conversas coas disidencias das FARC.
