Rusia quedouse fóra do Consello de Dereitos Humanos tras perder a votación para ocupar un asento no organismo, do que foi suspendido en abril de 2022 polas mortes de civís denunciadas por Kíiv no marco da invasión de Moscova sobre Ucraína.
Desta maneira, o Estado ruso perdeu a votación na que se enfrontaba a Albania e Bulgaria, que recibiron 123 e 160 votos respectivamente, que superaron os 97 necesarios para obter un asento para a rexión de Europa do leste na organización.
Moscova ficou ás portas de poder acceder ao Consello dos Dereitos Humanos, ao obter 83 votos. Outros Estados que si o lograron foron a China, Kuwait, Burundi, o Brasil, Costa de Marfil, a República Dominicana, Francia, Indonesia, o Xapón, Malawi e os Países Baixos. Os Estados escollidos ocuparán os seus respectivos asentos no organismo internacional desde o 1 de xaneiro de 2024 e por un período de tres anos.
Por outra parte, as autoridades diplomáticas rusas confirmaron esta terza feira que o ministro de Exteriores, Sergei Lavrov, desprazarase a próxima segunda feira a Beijing para asistir a unha cimeira comercial e reunirse co seu homólogo chinés, Wang Yi.
Segundo detallou a portavoz de Exteriores rusa, Maria Zajarova, a visita de Lavrov durará tres xornadas, e está previsto que o ministro participe no foro internacional 'Un cinto, unha ruta', que busca desenvolver a infraestrutura para crear unha rede de ferrocarril que una os Estados do centro, do sur e do oeste de Asia coa China.
Pola súa parte, o presidente de Rusia, Vladimir Putin, mantivo esta terza feira unha reunión en Moscova co primeiro ministro de Iraq, Mohammed al-Sudani, na que afirmou que o conflito desatado nos territorios de Palestina e Israel é un "vivo exemplo do fracaso" da política dos EUA.
Putin apelou "á necesidade de aplicar as decisións do Consello de Seguridade da ONU [Nacións Unidas] sobre o estabelecemento dun Estado palestino soberano e independente" como un dos pasos requiridos para chegar a unha solución do conflito.
