Moscova descarta que Kíiv atacara os gasodutos Nord Stream

Fica claro que “os autores do atentado terrorista queren desviar a atención, trátase dun conto mediático coordinado”, subliñou a cuarta feira o voceiro do Kremlin, Dmitri Peskov, en resposta á publicación un día antes e con poucas horas de diferenza en The New York Times e Die Zeit de noticias que vinculan o ataque contra os gasodutos Nord Stream con Ucraína. O xornal estadounidense apelou a testemuños de funcionarios dos Estados Unidos non identificados para afirmar que un grupo pro ucraíno provocou as explosións nos gasodutos que unen Rusia con Alemaña o 26 de setembro de 2022, iso si, incidindo en que non hai evidencias de que o presidente ucraíno, Volodimir Zelenski, o Reino Unido ou os Estados Unidos estiveran implicados. Mentres, o semanario alemán, nun traballo conxunto con outros medios locais, foi máis aló e sinalou que unha empresa pertencente a dúas persoas ucraínas e con sede en Polonia alugou un iate para perpetrar o atentado industrial, e debulla que -é posíbel- que fora cometido por unha tripulación de seis persoas, “un capitán, dous mergulladores, dous asistentes de mergullo e unha médica”, que terían instalado os explosivos cos que foron danados, cuxos restos terían sido atopados polos investigadores alemáns tras ser entregado o iate sen limpar após o alugueiro, sosteñen citando a Fiscalía federal. Pola súa parte, o británico The Times profundou onte nesta teoría indicando que funcionarios escandinavos foron informados disto unha semana despois do atentado, sendo advertidos de que os datos non se farían públicos posto que “funcionarios da Organización do Tratado do Atlántico Norte (OTAN) querían protexer Ucraína dunha disputa pública con Alemaña”, o terceiro Estado que máis asistencia lle enviou (máis de 6.000 millóns de euros, un terzo en armamento) e cuxas empresas posúen xunto compañías británicas, francesas, holandesas ou rusas os gasodutos Nord Stream 1 e Nord Stream 2. En todo caso, a propia Fiscalía federal de Alemaña trasladou unha información diferente ao comunicar que entre o 18 e 20 de xaneiro rexistrou un barco alugado por unha empresa alemá que “podería terse usado para transportar os artefactos explosivos que estouparon o 26 de setembro”, sen ofrecer máis datos ao respecto. As autoridades rusas cuestionan que estas publicacións se produzan tras a difusión dun artigo do xornalista galardoado co premio Pulitzer Seymour Hersh, no que responsabiliza Washington -que o nega- do ataque coa axuda de membros da OTAN e poñía o foco en que tería sido autorizado polo presidente Joe Biden para evitar que as importacións alemás de gas natural ruso freasen as intencións dos Estados Unidos de que os países da OTAN intensificasen os envíos de armas a Ucraína. “Isto cheira a crime atroz, como mínimo, os países accionistas dos Nord Stream e a Organización das Nacións Unidas (ONU) deberían exixir unha investigación urxente e transparente”, resolveu Peskov, que criticou que non se permita a Rusia participar nas investigacións que están a desenvolver Suecia, Dinamarca e Alemaña, que apenas ofreceron resultados até o de agora. O xeneral das Forzas Armadas de Francia, Dominique Trinquand, ex representante militar do país da OTAN perante a ONU, apuntou que o motivo é que “probabelmente hai conclusións que non queremos dar”, e avalou a investigación de Hersh. Asemade, salientou que se fose responsabilidade rusa —como deixaron entrever nun primeiro momento os membros da alianza militar— xa “terían atopado probas”, instando a cuestionar quen se beneficia do atentado. Aínda así, o ministro de Defensa alemán, Boris Pistorius, alertou de que até o final das pescudas non se pode descartar que se tratase dunha “operación de falsa bandeira organizada para culpar Ucraína”. Ao tempo, tanto os Estados Unidos como a alianza militar que lideran reiteraron que é preciso agardar a fin das investigacións nacionais antes de emitir unha posición oficial. As publicacións dos medios occidentais puxeron de acordo Moscova e Kíiv, pois tanto Mykhailo Podolyak, conselleiro do presidente Zelenski, como Oleksi Reznikov, ministro de Defensa de Ucraína, negaron calquera relación co atentado. Arredor deste asunto, Beijing exixiu unha investigación profunda sobre o acontecido e reclamou a Washington unha explicación. A construción do Nord Stream 1 e do Nord Stream 2 foi moi criticada polos Estados Unidos, que chegaron a impor sancións contra a infraestrutura a pesar da participación de empresas de Alemaña, defendendo que xeraría dependencia do gas natural ruso e debilitaría a posición de Ucraína ao non depender de Kíiv o paso do gas como viña acontecendo. En paralelo, o menor prezo do transporte por gasoduto acababa coa competitividade do gas natural licuado estadounidense, que se move por mar, e que aumentou 137% as súas vendas á Unión Europea nos primeiros 11 meses de 2022 en comparación co mesmo período no ano anterior. Exportación de gran No que atinxe ao acordo entre Rusia, Ucraína, Turquía e a ONU para a exportación de cereais polo mar Negro, o secretario xeral da ONU, António Guterres, estivo onte en Kíiv para reunirse con Zelenski. Ambos os dous solicitaron a extensión do acordo, que expira o 18 de marzo. Porén, fontes diplomáticas turcas transmitiron a Al Jazeera que “non se superaron” as dificultades derivadas das sancións da OTAN e os seus aliados para exportar produtos agrícolas e fertilizantes rusos, que Moscova exixe resolver antes de proseguir co acordo, indicando que frean entregas para países en desenvolvemento mentres acaparan o gran ucraíno. Con relación ás entregas de armas a Ucraína, Suíza fechou a porta a aceptar que outros países reexporten a Kíiv o material militar vendido por empresas suízas, apelando a que isto afectaría a neutralidade declarada da Confederación. Kíiv pide máis munición á UE A Unión Europea debateu onte o plan do Alto representante para Política Exterior, Josep Borrell, de dedicar 1.000 millóns de euros para comprar munición de artillería para o Exército ucraíno. Porén, Kíiv destacou que a cantidade é insuficiente e pediu investir 4.000 millóns de euros. No plano militar, a OTAN admitiu que a cidade de Bakhmut, en Donetsk, podería ficar controlada por Rusia nos vindeiros días a pesar dos anuncios ucraínos do envío de reforzos. Entrementres, desde Moscova sosteñen que se fixeron co leste da cidade.