Un informe da Xustiza dos Estados Unidos cuestiona a capacidade mental de Biden

A “miña memoria está ben” e “até se fai referencia a que non lembro cando morreu o meu fillo, como diaños se atreve a cuestionar iso?”, “teño boas intencións e son un home maior e sei que demo estou a facer”, afirmou na madrugada de hoxe visibelmente enfadado o presidente dos Estados Unidos de América (EUA), Joe Biden. Pouco antes, o fiscal especial Robert Hur fixera público o seu informe arredor dos documentos confidenciais atopados nunha oficina e na casa particular do mandatario sobre a invasión estadounidense de Afganistán. Aínda que o documento recomenda non presentar cargos penais contra Biden, cuestiona en distintos puntos a capacidade mental do presidente, multiplicando as dúbidas ao respecto da súa campaña electoral de cara aos comicios de novembro, nos que aspira a ser reelixido para un novo mandato de catro anos. Bob Bauer, avogado do líder do Executivo, acusou Hur de “destruílo” e violar normas “ben estabelecidas”, e nunha misiva adxunta ao informe asinada canda Richard Sauber, o outro letrado do presidente, sostén que incorre nunha terxiversación “incendiaria”. En primeiro lugar, a resolución de Hur subliña que conta con evidencias de que Biden retivo e revelou “intencionalmente” materiais marcados até como arquivos ultrasecretos cando se desempeñaba como un cidadán privado. Estes documentos atinxen a un incremento das tropas en Afganistán durante o Goberno de Barack Obama (2009-2017), no que Biden ocupou a Vicepresidencia. O actual mandatario opúxose á medida e gardou rexistros que amosaban a súa posición. Unha parte destes materiais clasificados foron compartidos por Biden co seu escritor pantasma (unha persoa que escribe un contido en nome dunha organización ou individuo, que publica a obra como propia), co que elaborou dous libros de memorias. Así e todo, unha porción significativa do informe está dedicada a xustificar a non presentación de cargos, malia que a política do Departamento de Xustiza exclúe esta posibilidade no caso dun presidente en exercicio, apuntando que, entre outras cuestións, “consideramos que, no xuízo, o señor Biden probabelmente se presentaría ante un xurado, como o fixo durante a nosa entrevista, como un ancián comprensivo, ben intencionado e con mala memoria”, o que provocaría que “moitos xurados” quixesen “buscar a dúbida razoábel”. Nese sentido, Hur recalca que “sería difícil convencer un xurado” de condenalo “por un delito grave que require un estado mental de voluntariedade”, sobre todo tendo en conta que nesa altura se trataría dun “ex presidente ben entrado nos oitenta anos”. "Limitacións significativas" O informe salienta que a súa memoria “parecía ter limitacións significativas” nunhas gravacións sobre Afganistán de 2017, nas que as conversas “son acotío dolorosamente lentas, co señor Biden loitando por recordar os acontecementos e esforzándose ás veces por ler e relatar as súas propias anotacións no caderno”. Na entrevista co Departamento de Xustiza, “a memoria do señor Biden foi peor”, prosegue Hur, que narra como “non recordaba cando foi vicepresidente” ou “cando morreu o seu fillo Beau [falecido en 2015]”, e a “súa memoria semellaba confusa ao describir o debate sobre Afganistán, que no seu día foi tan importante para el”. Á publicación do documento seguiron as críticas contra Biden desde as filas republicanas. Jim Jordan, presidente da Comisión Xudicial do Senado, sinalou que o informe “di dúas cousas”, que “Biden non é apto para o cargo” e que “hai unha dobre vara de medir na Xustiza deste país”, en alusión aos 37 cargos presentados contra o ex presidente entre 2017 e 2021, Donald Trump, por gardar documentos confidenciais tras a fin do seu mandato. Neste aspecto Hur diferencia no texto ambas as dúas investigacións, destacando que o actual mandatario colaborou coa Xustiza desde o inicio, en cambio, Trump “non só se negou a devolver os documentos durante moitos meses, senón que tamén obstruíu a Xustiza”. Non obstante, o caso “fortalece o argumento político” de Trump. Ao tempo, “non é probábel” que Biden siga a utilizar un dos seus argumentos máis manidos, que é un administrador máis “competente” e eficaz que Trump, substituíndo con “normalidade” o “caos” do mandato do republicano, explica a axencia AP. O certo é que unha enquisa divulgada polo medio o pasado ano revela que 77% da poboación estadounidense considera que Biden, que de recuncar sairía con 86 anos da Presidencia, é demasiado maior para un novo mandato, o que comparten 69% dos partidarios da súa formación, o Partido Demócrata. Precisamente hoxe, durante a intervención na que pretendía acabar co debate sobre a súa capacidade para dirixir o país, definiu Abdulfatah al Sisi, o líder exipcio, como “presidente de México”, e nas últimas xornadas asegurou que se reuniu en 2021 co ex presidente francés François Mitterrand, que morreu en 1996. Trump marcha de Nevada como candidato virtual Na madrugada de hoxe confirmouse que Donald Trump obtivo case 98% dos apoios nos caucus (asembleas electorais) de Nevada, así como 75% nas Illas Virxes estadounidenses, nas que non chegou a facer campaña, no contexto das primarias republicanas. O éxito do ex presidente nestes territorios, que se suma aos de Iowa e Nova Hampshire, consolídano como o probábel candidato da formación nas presidenciais previstas para o 5 de novembro. Especialmente despois dos resultados das primarias de Nevada organizadas de forma separada polas autoridades estatais, que decorreron esta semana, após unha disputa co partido. Nesas votacións, que non outorgaban delegadas e delegados -as persoas encargadas de formalizar a designación dunha ou doutra candidatura-, a principal rival de Trump (que non se presentou), a ex embaixadora na Organización das Nacións Unidas (ONU) Nikki Haley, perdeu fronte á opción “ningunha das candidaturas”. Xa no tocante ás primarias demócratas en Nevada, o triunfo recaeu no presidente Joe Biden. A vitoria de Trump gaña relevancia ao deixar entrever o Tribunal Supremo, no marco do estudo da inhabilitación en Colorado ao ex presidente, que rexeitará deixalo fóra das papeletas por insurrección.