Os 1.500 soldados franceses estacionados en Níxer finalizaron hoxe a súa retirada do territorio africano, o terceiro país da rexión do Sahel que conseguiu no último ano e medio a súa expulsión tras Malí e Burkina Faso. Os tres Estados sufriron a colonización de Francia.
A saída do país foi anunciada en setembro polo presidente francés, Emmanuel Macron, após negarse a recoñecer a Xunta Militar que se fixo co poder nun golpe de Estado incruento a finais de xullo en detrimento do ex mandatario Mohamed Bazoum, un dos principais aliados de París e da Unión Europea na zona.
Níxer chegou a acusar Francia de preparar unha intervención militar cos membros da Comunidade Económica de Estados de África Occidental para restaurar Bazoum, mais a entidade finalmente descartou esta opción.
Aínda fican en Níxer arredor de 1.000 militares dos Estados Unidos e aproximadamente 600 de Italia e Alemaña. O titular de Defensa alemán, Boris Pistorius, estivo no país a comezos de semana para abordar o futuro do continxente teutón.