ERC valida o pacto co PSOE e Junts negocia os últimos puntos da lei de amnistía

O rexistro no Congreso do Proxecto de lei de amnistía ás e aos independentistas represaliados pola súa participación no proceso de autodeterminación en Catalunya fica pendente da decisión final de Junts, que como moi cedo se producirá a sexta feira, xusto o día no que o PSOE aspiraba a presentar a norma no lexislativo. Se a formación do ex presidente catalán Carles Puigdemont aproba o acordo co PSOE, o que desencadearía o comezo da tramitación na Cámara Baixa da amnistía, unha das exixencias das forzas nacionalistas catalás, Esquerra Republicana de Catalunya (ERC) e Junts, para que o presidente español, Pedro Sánchez (PSOE), sexa reelixido, só restarían por fechar os acordos co Partido Nacionalista Vasco (PNV) e o Bloque Nacionalista Galego (BNG) para que Sánchez teña garantidos os apoios necesarios. Esta última formación tratará a sexta feira na Executiva Nacional a situación das negociacións co partido estatal, mentres que EH Bildu confirmou o seu apoio. No tocante á amnistía, e como reclamaran as formacións catalás, fontes parlamentarias ratificaron a medios estatais que se estenderá até unha década atrás, incluíndo as persoas represaliadas arredor do proceso participativo sobre o futuro político de Catalunya do 9 de novembro de 2014, no que a meirande parte das e dos votantes trasladou o seu apoio á independencia do territorio, e do referendo de autodeterminación do 1 de outubro de 2017, que deixou o mesmo resultado. En paralelo, tamén foron incluídas as persoas acusadas por participar nos Comitès de Defensa de la República (CDR) e Tsunami Democràtic. Até 12 membros dos CDR están pendentes de xuízo por suposta pertenza a unha organización terrorista, unha denominación utilizada polo Estado español para perseguilos e que tamén impuxo á Europol, que abarca os Estados da Unión Europea, co fin de tratar de deslexitimar o independentismo, como amosa a solicitude de Madrid á entidade comunitaria de desvincular o movemento político do terrorismo no contexto das negociacións. No que atinxe a Tsunami Democràtic, unha plataforma que organizou o bloqueo do aeroporto Josep Tarradellas Barcelona-El Prat en protesta polas sentenzas de prisión contra os ex integrantes do Goberno catalán que non foron ao exilio, así como cortes de estrada, e que está sendo investigada por supostos indicios de terrorismo, a amnistía permitirá a volta do exilio en Suíza da secretaria xeral de ERC, Marta Rovira. Estes puntos forman parte do acordo de investidura entre o PSOE e ERC, após acelerarse as negociacións nas últimas xornadas, tras a reunión en Bruxelas (Bélxica) do secretario de Organización do PSOE, Santos Cerdán, con Puigdemont. O pacto foi validado a quinta feira pola Executiva Nacional de ERC. Competencias no sistema ferroviario O acordo específico de ERC co PSOE inclúe unha das reivindicacións chave do soberanismo catalán nas últimas décadas, o traspaso íntegro de Rodalies, o servizo de trens de proximidade en Catalunya. Aínda que a competencia da súa xestión pasou a Barcelona en 2010 canda a dos servizos de media distancia, a estatal Renfe continuou como operadora do servizo, cuxa infraestrutura pertence a Adif. Deste xeito, Catalunya faise co control dunha rede ferroviaria de 1.119 km con 200 estacións, e que usa 71% da poboación catalá. En última instancia, o entendemento tamén recolle a condonación de 20% da débeda da Generalitat co Fondo de Liquidez Autonómica, un mecanismo estatal, e que equivale a máis de 15.000 millóns de euros. Pola súa parte, Puigdemont liderou unha xuntanza da dirección de Junts para explicar os avances nas negociacións co PSOE, nunhas conversas que segundo Jaume Asens, o negociador de Sumar, formación que conformará unha coalición de Goberno co PSOE de ser investido Sánchez, estaban pendentes apenas de elementos “menores e secundarios” sobre a amnistía, mais sen descartar que puidesen desencarrilar. Ademais da amnistía, Junts tamén exixiu como condición previa para apoiar Sánchez un pacto para que un relator internacional se encargue de mediar no conflito entre o Estado español e Catalunya, e o recoñecemento por parte de Madrid de que Catalunya é unha nación, o que constataría o seu dereito á autodeterminación. Fontes citadas polo xornal El Periódico desvelaron que o PSOE cedeu tamén nestes dous puntos, englobados na redacción do acordo, e que o debate nestes momentos se circunscribe a un parágrafo sobre o alcance da lei de amnistía, no que a forza catalá defende incluír os casos de lawfare, un termo que se refire ao uso do sistema xudicial para deslexitimar un rival político, unha situación que atribúe a condenas como a do ex conselleiro de Interior Miquel Buch, sentenciado a catro anos e medio de prisión por enviar un membro das forzas de seguridade catalás a Bruxelas para protexer Puigdemont. Finalmente, a reunión da dirección de Junts rematou sen acordo ao respecto da proposta de pacto co PSOE. De producirse o acordo, a formación catalá ten previsto aprobalo no Consell Nacional antes de que a militancia teña a última palabra por medio dunha consulta. O PP intenta dilatar a aprobación da amnistía A resposta do Partido Popular (PP) aos avances na amnistía foi presentar unha reforma do regulamento do Senado, no que conta con maioría absoluta, para que sexa a Mesa da Cámara Alta baixo o seu control a que determine en que casos se aplica o procedemento de urxencia nos proxectos de lei, co que de forma previsíbel será tramitada a norma. En todo caso, a Carta Magna brinda un prazo máximo de dous meses para que o Senado tome unha decisión. Precisamente a formación conservadora leva bloqueando durante case cinco anos a renovación do Consello Xeral do Poder Xudicial para conservar a maioría de membros conservadores. O seu presidente interino, Vicente Guilarte, convocou a segunda feira un pleno extraordinario reclamado por maxistrados conservadores para que o órgano rexeite un Proxecto de lei de amnistía. O deputado do BNG no Congreso, Néstor Rego, subliñou a Nós Diario que “hai que avanzar na desxudicialización da vida política”, e fixo fincapé en que “nos parece lóxico o traspaso de Rodalies, na Galiza a cuestión non é que non se poidan traspasar as cercanías porque aínda non existen, e o BNG leva moito tempo insistindo niso, en que é un servizo imprescindíbel para acabar coa discriminación do noso país nesta materia”.