A morte dun adolescente de 17 anos a mans dun policía na cidade de Nanterre desencadeou unha onda de protestas por toda Francia que xa dura catro días.
Os fortes choques entre a Policía e os manifestantes están axitando máis aínda a situación e mesmo produciron unha nova morte, a dun home de 54 anos na Güiana francesa que recibiu un impacto dunha bala perdida cando estaba no seu balcón.
As autoridades anunciaron que mobilizarían a 40.000 axentes para facer fronte ás protestas, mais miles de persoas saíron ás rúas na noite da quinta feira.
Neste contexto, o ministro do Interior francés, Gérald Darmanin, comunicou que ao longo da terceira noite de protestas, a Policía detivo a un total de 875 persoas que participaron nelas.
A rabia contra a represión policial, segundo medios locais e imaxes publicadas en diversas redes sociais, derivou en incendios nas cidades de París, Nanterre, Toulouse, Sevran, Lille, Lyon, Montreuil, Roubaix e Saint-Denis, entre outras localidades.
En Nanterre, a cidade onde o rapaz de 17 anos foi abatido pola Policía, producíronse violentos enfrontamentos en varios barrios da cidade, nos que a Policía empregou granadas de gas lacrimóxeno para conter as protestas, mentres que os manifestantes contestaron con fogos artificiais.
O presidente galo, Emmanuel Macron, presidiu esta sexta feira unha reunión dunha comisión de crise polos disturbios. As autoridades francesas decidiron suspender o transporte público e despregar varios vehículos blindados para facer fronte ás protestas que se desenvolveron na pasada noite.
En concreto, a Xendarmería usou 14 carros Berliet VXB 170 e catro Centaurs. Trátase da primeira vez que se lle dá uso aos Centaurs, o novo vehículo adquirido polas forzas da orde galas.
![Sira Rego é ministra con Sumar. [Imaxe: Alberto Ortega / Europa Press]](/asset/zoomcrop,480,270,center,center/media/nosdiario/images/2024/05/01/2024050122045973661.jpg)
