A Xunta, a instancia dos sindicatos, require a Alcoa que retire o ERE e agarde pola venda

Os sindicatos manterán unha reunión con Liberty House, multinacional interesada en mercar as factorías de Alcoa, o día 3 en Compostela.
Reunión do comité de empresa de Alcoa San Cibrao co conselleiro de Industria (Xunta da Galiza)
photo_camera Reunión do comité de empresa de Alcoa San Cibrao co conselleiro de Industria (Xunta da Galiza)

A aparición dunha empresa que ten a intención de mercar as factorías de Alcoa en San Cibrao acelerou nas últimas horas as accións para tentar evitar que se faga efectivo o expediente de regulación de emprego (ERE) previsto para o vindeiro 4 de agosto. A Xunta, como autoridade laboral competente na Galiza, enviou esta sexta feira un requirimento á multinacional para que retire o ERE que ameaza 534 empregos da planta de aluminio e máis de 400 nas auxiliares. A decisión tomouna o conselleiro de Industria, Francisco Conde, após manter unha reunión co comité de empresa que informou que manterá unha xuntanza a vindeira segunda feira con Liberty House, a multinacional interesada en adquirir as plantas. 

Paralizar o ERE e negociar a venda

"É fundamental que os Gobernos galego e español eviten que a multinacional consuma a parada das cubas e faga efectivos os despedimentos", sinala a Nós Diario Paulo Carril, secretario xeral da CIG, "ademais é urxente que se convoque a mesa multilateral e que sexamos capaces de paralizar o ERE, así como que colla máis forza a continuidade da actividade produtiva, cunha intervención pública", engade. A confirmación do interese de Liberty House polas factorías indica, segundo Carril “que é mentira todo o que Alcoa di en relación a que é inviábel a produción de aluminio primario na factoría da Mariña". 

Con esta multinacional manterá unha reunión o comité de empresa o 3 de agosto, un día antes de que finalicen as negociacións para o ERE que pensa realizar Alcoa. "Segundo sabemos, a multinacional  xa ten avanzada unha negociación coa Administración española e reuniranse tamén a segunda feira co Goberno galego", explica Victor Ledo (CCOO) a Nós Diario, "e coa actual postura de Alcoa as Administracións non lles queda outra que mollarse os días seguintes", sinala. Desde UXT, Javier Carreiro apunta que a nova empresa "ten que pór o seu proxecto enriba da mesa para que non se paralicen as cubas que implicaría despedimentos". 

Piden cárcere polos incidentes con Alu Ibérica

A Fiscalía pide 12 e 15 meses de cárcere para dous traballadores da planta de Alu Ibérica da Coruña -antiga Alcoa- pola protesta de marzo de 2019 en defensa da planta ante o Congreso dos Deputados. Segundo os traballadores, non "arremeteron" contra os axentes da policía e, ao contrario, afirman que foron "vítimas" dunha carga "desproporcionada". Estas demandas "ratifican" a petición da xuíza de Instrución 25 de Madrid e, polo momento, non hai data para o xuízo oral.

Comentarios