martes 04/08/20

Liberty House, a multinacional británica interesada en adquirir as plantas de Alcoa en San Cibrao

Alcoa só está interesada en vender unha.

Instalacións de Alcoa en San Cibrao (Cervo).
Instalacións de Alcoa en San Cibrao (Cervo).

O comité de empresa de Alcoa San Cibrao informou que a multinacional lle comunicou no transcurso da  xuntanza que se está a realizar  no marco do período de consultas do ERE, que o comprador interesado en facerse coas plantas é a multinacional  Liberty House  Group.

Liberty House Group é unha multinacional do metal situada en Reino Unido que xa mostrou en 2019 o seu interese en facerse coas plantas de Alcoa da Coruña e Avilés --que adquiriu Parter--.

En 2019, Liberty House fíxose con varias plantas siderúrxicas de ArcelorMittal. Unha operación que recibiu o visto e prace de Bruxelas ao non expor problemas de competencia no mercado único, dado que só observou solapamentos "limitados" entre as actividades.

Segundo informa o comité de empresa, Alcoa aclarou que ese posíbel comprador estaría interesado na adquisición das dúas plantas que forman o complexo industrial de Alcoa en San Cibrao, tanto a de  alúmina como a de aluminio primario.

Porén, Alcoa tamén lle comunicou á representación dos traballadores que só está interesada en vender coas cubas paradas, algo ao que se opón o comité de empresa, porque sostén que iso significaría “matar o corazón da fábrica”.

Ademais, a multinacional tamén informou ao comité que, neste momento, só estaría interesada en vender a planta de aluminio.

comentarios