A sede da Federación Galega de Confrarías de Pescadores reuniu a representes do sector pesqueiro e de diversas administracións para debater a problemática xerada polos proxectos da eólica mariña.
O encontro contou coa presenza de representantes da administración pesqueira da Galiza, Canarias e do Estado así como de colectivos de pescadores chegados de Andalucía, Asturias, Canarias e Galiza, os territorios máis afectados polos proxectos da eólica mariña.
Os membros dos Gobernos da Galiza, Canarias e o Estado coincidiron na necesidade de coñecer o impacto socioeconómico da eólica mariña “antes de proceder a adoptar decisións sobre a implantación destas industrias nos nosos mares”.
Os colectivos de pescadores agrupados na Mesa en Defensa do Sector Pesqueiro incidiron en ter “en conta a premisa indiscutíbel de non interferir na actividade pesqueira sostíbel que vén desenvolvendo a pesca nas nosas costas”.
A Mesa en Defensa do Sector Pesqueiro considera preciso contar coa “mellor información científica” para proceder a ordenación e desenvolvemento da eólica mariña no Estado e reclama “unir coñecementos científicos sobre afectacións aos ecosistemas”.
As entidades representativas dos pescadores reunidas en Compostela “amosaron a súa total desconformidade co proceder do Ministerio de Transición Ecolóxica e Reto Demográfico, ao tentar planificar os espazos mariños sen ter en conta a importante riqueza biolóxica dos nosos mares e a importancia socioeconómica da actividade Pesqueira”.
O parque eólico Volanteiro
O encontro desta mañá serviu para presentar as alegacións da Mesa en Defensa do Sector Pesqueiro ao parque eólico mariño Volanteiro, que a empresa madrileña Capital Energy pretende instalar a preto de 30 quilómetros da costa de Vigo e do Baixo Miño.
O sector pesqueiro rexeita esta instalación porque “afecta directa e indirectamente a máis de 20 caladoiros de pesca, a unha importante actividade pesqueira de embarcacións de palangre, arrastre, volante e artes menores, e en definitiva a un proxecto que só ten como obxectivo a produción de enerxía”.