Usuarias e usuarios dos trens de Renfe veñen de criticar unha vez máis as tarifas para viaxar en tren entre as cidades de Ourense e A Coruña.
A través das redes sociais trasladan a consideración de que hai certa desigualdade nos custes estabelecidos pola empresa ferroviaria.
Segundo remarcan, moverse entre dúas das principais cidades galegas implica un custo de 20,25 euros a viaxe, é dicir, a ida e a volta sairían por máis de 40 euros agás no caso de aproveitar algún tipo de desconto.
Curiosamente “Renfe ofrece viaxes a Madrid, desde Ourense, por 15 euros”, algo que non comprenden moitas persoas que habitualmente precisan unha conectividade dentro do propio país.
Ponte da constitución:
— o Emilio (@ertilve) October 15, 2021
Ourense - Madrid: 15€
Madrid - Ourense: 15€
Ourense - A Coruña: 20 €
A Coruña - Ourense: 20 €@Renfe e o AVANT son unha tomadura de pelo máis de España. #MexanPorNós. pic.twitter.com/PIR9gBtLDC
Foron prezos que se detectaron, por exemplo, para a próxima ponte da Constitución Española. "@Renfe e o AVANT son unha tomadura de pelo máis de España", sinalou molesta unha das persoas que se sinten afectadas.
Queixas polos pequenos atrasos
Á marxe das críticas polos prezos dos billetes, nas últimas semanas -xa antes da folga do persoal da compañía- escoitábanse certas queixas na Galiza polos cada vez máis habituais atrasos nos trens.
Malia que as chegadas e saídas varían escasos minutos do estipulado por Renfe, o certo é que esas pequenas variacións vanse acumulando cando antes o que se destacaba do servizo era a súa puntualidade ou mesmo que os trens chegaban antes do previsto a destino.
Aliás, tamén na pasada sexta feira -cando se levantou o paro- houbo certo descontrol, chegando a desaparecer das pantallas e da axenda un tren que conectaba Santiago e A Coruña a última hora da noite. As e os viaxeiros só tiveron advertencia por parte da compañía cando o tren alternativo -máis tardío- ía marchar e o vivido na estación compostelá foi un caos.