Os galegos e galegas xa poden pagar os seus impostos, taxas ou ingresos xestionados pola Axencia Tributaria da Galiza (Atriga), a través da plataforma Bizum, tal e como informou esta quinta feira a Consellaría de Facenda e Administración Pública.
Con esta forma de pago, aberta tanto a particularidades como a empresas, amplíanse as canles xa dispoñíbeis para facilitar o cumprimento das obrigacións tributarias á cidadanía, permitindo evitar desprazamentos e aforrar tempo nos trámites.
O pago coa plataforma Bizum pódese levar a cabo a través da pasarela de pago da Oficina Virtual Tributaria da Atriga, con todas as entidades bancarias que dispoñen de Bizum para comercios e sen implicar ningunha comisión para o cliente.
A Administración destacou que a cidadanía galega tamén ten á súa disposición outras formas de pago, como a posibilidade de abonar en liña a través da Oficina Virtual Tributaria da Atriga.
O pagamento en liña pode realizarse cunha tarxeta de crédito ou débito para todos os ingresos xestionados por este organismo, evitando así os desprazamentos ás oficinas bancarias.
Así mesmo, os pagamentos das autoliquidacións do Imposto de Sucesións e Doazóns, do Imposto de Transmisións Patrimoniais e Actos Xurídicos Documentados (ITP-AXD) e de vehículos usados por importe de até 3.000 euros, pódense realizar a través dun Terminal en Punto de Venda (TPV) físico.
É posíbel realizar esta operación mediante tarxeta de crédito ou débito de calquera entidade bancaria sen comisión de utilización para o contribuínte, no mesmo momento no que se estea realizando a presentación dos impostos en calquera das cinco delegacións da Atriga (A Coruña, Lugo, Ourense, Pontevedra e Vigo).
Ademais, pódese realizar o pagamento de débedas tributarias a través de xiro postal e ampliaranse os acordos con entidades bancarias para poder realizar o pagamento de impostos a través de caixeiros automáticos. Neste momento, xa é posíbel facer estas xestións nos caixeiros do Banco Santander e de CaixaBank.
