Ayuso promete ante Rueda agudizar o 'dumping' fiscal que provoca fugas de capital na Galiza

A presidenta da Comunidade de Madrid, Isabel Díaz Ayuso (Partido Popular), anunciou esta segunda feira que incluirá no seu programa electoral para as eleccións autonómicas do 28 de maio unha nova rebaixa de medio punto porcentual en todos os tramos do Imposto sobre a Renda das Persoas Físicas (IRPF) na seguinte lexislatura. Imposto de Sociedades na Galiza: unha fuga de 1.400 millóns Desta forma, Díaz Ayuso aposta por agudizar as súas políticas de dumping fiscal, moi criticadas desde diferentes autonomías do Estado. Ademais, a presidenta madrileña apunta a rebaixas impositivas en todos os tramos se consegue continuar á fronte do Executivo da comunidade, indo polo tanto en contra do criterio da progresividade fiscal e da redistribución da riqueza. O dumping fiscal refírese aos beneficios fiscais que ofrecen algunhas autonomías a través de deducións e bonificacións para reducir impostos á baixa ou mesmo a cero, xerando unha competencia desleal coas demais e buscando que sexa máis atractivo para persoas ou empresas asentarse no territorio. Neste sentido, Madrid conta coa vantaxe da capitalidade do Estado, o que implica que moitas empresas e que a práctica totalidade dos organismos estatais teñan sede nesa comunidade. Polo tanto, aínda que outra autonomía decidise facer dumping fiscal, non podería conseguir os mesmos resultados tributarios. A baixada de impostos de madrid implica que o capital saia doutras autonomías A cualificación das baixadas do IRPF como dumping fiscal é unha cuestión que leva anos inmersa no debate sobre o financiamento das Administracións públicas. Xa en 2020, a Rede Europea contra a Pobreza (EAPN polas súas siglas en inglés), no seu Estudo sobre unha fiscalidade xusta como ferramenta de loita contra a pobreza e a exclusión social, alertaba dunha das súas principais consecuencias, como é a aparición de "contribuíntes deslocalizados", é dicir, persoas que mudan de forma ficticia a súa residencia oficial a outras autonomías nas que non residen para beneficiarse das rebaixas de impostos, algo que é considerado unha elusión fiscal. "As autonomías afectadas por estas elusións provocadas polo que denominan dumping fiscal duns territorios sobre outros sinalan que este ten un dobre efecto: por unha parte, sobre os tributos que recadan as propias administracións territoriais, mais tamén sobre a recadación do IRPF, unha das bases sobre as que se calculan as transferencias do sistema de financiamento autonómico", sinala o estudo. O presidente da Xunta da Galiza, Alfonso Rueda, que tamén acudiu esta segunda feira ao acto no que Ayuso anunciou os seus novos plans no campo da fiscalidade, non reaccionou con preocupación pola posibilidade de que medren os contribuíntes deslocalizados en Madrid a raíz das rebaixas no IRPF. Polo contrario, Rueda sinalou que "Madrid e a Galiza avanzan con forza. É moito o que nos une: miles de madrileños visitáronnos en Semana Santa e moitos 'madrigallegos' teñen en Madrid a súa segunda terra". Ayuso, acompañada polo líder estatal do PP, Alberto Núñez Feixoo, lembrou nun almorzo informativo, que hoxe comeza a campaña da Renda e que a cidadanía madrileña "poderá notar na súa declaración a baixada de medio punto en todos os tramos do IRPF" que se aprobou en 2021. O pasado ano 2022, o conselleiro de Facenda, Economía e Emprego do Executivo madrileño, Javier Fernández-Lasquetty, presumía de que o Goberno desta comunidade leva "18 anos seguidos baixando todos os impostos e sen subir ningún”. Así, o IRPF non é o único campo da batalla fiscal por atraer contribuíntes. En Madrid e Andalucía aplícase unha bonificación de 99% na cota tributaria do imposto de sucesións e doazóns. Estas autonomías tamén suprimiron o imposto sobre o Patrimonio, mentres continúa o debate sobre se estas políticas lastran o financiamento doutros territorios. A oposición cifra en 34 millóns de euros a rebaixa fiscal da Xunta ás persoas máis ricas No caso do último tributo, o que pagan as persoas contribuíntes que posúen bens ou dereitos por máis de dous millóns de euros, a Galiza tamén se sumou aos beneficios fiscais ás grandes fortunas, elevando até 50% (antes en 25%) a bonificación ao imposto ao patrimonio e situándose no podio dos territorios onde menos pagan as persoas con ingresos máis altos, por detrás de Madrid e Andalucía. Segundo denunciou a oposición no Parlamento galego, a rebaixa do imposto de patrimonio na Galiza suporá deixar de recadar 34 millóns de euros 7.700 grandes fortunas. Elusión de impostos nos portais turisticos dixitais UXT denunciou esta segunda feira que a elusión fiscal relacionada co turismo dixital está a afectar a economía estatal "até extremos insoportábeis", provocando que case 3.000 millóns de euros acaben no estranxeiro. O sindicato asegura que, segundo os datos de comercio electrónico da Comisión de Competencia (CNMC), unha gran parte das transaccións económicas relacionadas con esta actividade acaban fóra das fronteiras estatais. Xosé Regueira: "Temos a potencialidade de situar 'un menú turístico' competitivo a nivel estatal e internacional" De feito, explica a central sindical, as operacións efectuadas en sitios web estranxeiros alcanzan 42% do gasto, ao tempo que catro de cada dez euros do turismo en liña finalizan en terceiros Estados. Segundo afirma UXT, "as argucias legais e fiscais" que aplican estas plataformas dixitais conseguen deslocalizar a tributación das operacións turísticas, colocando gran parte dos seus beneficios en paraísos fiscais. Abre o prazo da modalidade en liña para declarar a renda Desde hoxe poden ser presentadas as declaracións do Imposto da Renda das Persoas Físicas (IRPF) e de Patrimonio por vía dixital. A tramitación por internet non deixa de gañar terreo, e xa se acollen a esta modalidade 9 de cada 10 persoas contribuíntes. As rebaixas fiscais da Xunta da Galiza só repercuten nas rendas máis altas O prazo para a formalización da declaración do IRPF e de Patrimonio por vía telefónica ficará aberto desde 5 de maio até 30 de xuño. Por outra parte, entre 1 e 30 de xuño as contribuíntes poderán presentar a súa declaración presencial nas oficinas da Axencia Tributaria. Novidades tributarias A Campaña da Renda deste ano presenta novidades en relación a outros exercicios. Entre elas, a achega individual máxima aos plans de pensións privados con dereito a dedución no IRPF redúcese até 1.500 euros anuais. Por outra parte, as contribucións máximas aos plans de empresa con dereito a dedución soben até os 8.500 euros. Ademais, as actividades económicas en estimación obxectiva beneficiaranse dun aumento da redución xeral sobre o rendemento neto de módulos de 5% a 15%. A Axencia Tributaria tamén fixa unha compensación de 35% do prezo de adquisición do gasóleo agrícola e de 15% do prezo de adquisición dos fertilizantes para as actividades dos sectores agrícola e gandeiro.