A hostalaría prevé o feche de entre 60% e 70% de bares na Galiza
"Poden fechar 60% ou 70% dos bares da Galiza". Así de contundente foi o presidente da Asociación Provincial de Empresarios de Hostalaría de Lugo, Cheché Real, en declaracións a Europa Press. Ademais, asegurou que debido aos efectos das restricións polas medidas contra a pandemia da Covid-19 esa porcentaxe de fechamentos vai ir en aumento.
Real volveu reivindicar que todas as Administracións se "arremanguen" e "axuden" o sector diante da actual situación.
"Isto é unha ruína absoluta", sinalou, "é imposíbel aguantar un negocio calquera desta maneira, ademais teremos cantidade de traballadoras e traballadores que van ir ao desemprego pola imposibilidade de manter o persoal nas empresas", lamentou.
"Pobres axudas" para a hostalaría galega
Cheché Real amosouse onte moi crítico coas Administracións. Exixiu que se "busque unha forma" de "condonar os créditos do Instituto de Crédito Oficial (ICO)" e amparouse en que "se non se poden facer ingresos como se vai poder facer fronte ás débedas? Iso é imposíbel!".
As "pobres axudas", como denominou o empresario, que recibiron, as e os hostaleiros apenas lles dan "para pagar algún imposto" que están "obrigados a satisfacer ás Administracións". Por este motivo asegurou que "isto é imposíbel, a situación é gravísima".
En relación aos concellos, Real volveu preguntarse "como" van pagar "impostos" ou taxas municipais se non lles "deixan traballar" polas restricións impostas ao sector. Ou ben, expuxo, "pago impostos e non como nin eu nin a miña familia, e aínda así non nos daría”, afirmou. Insistiu sobre a situación en que se atopan ao ser un sector "tocado".
Ademais, sinalou que dentro da hostalaría a situación é aínda peor para "o lecer nocturno, que leva once meses fechado".
