O Goberno español vén de denegar a solicitude de tres parques eólicos (Cima de Vila, A Boibela e Lucecú) na Galiza que sumaban un total de 241 megawatts de potencia instalada, os tres impulsados por Green Capital, por non superaren o trámite ambiental.
Segundo as resolucións publicadas polo Ministerio para a Transición Ecolóxica esta cuarta feira no Boletín Oficial do Estado (BOE), desestímase a petición de levar adiante o parque eólico Lucecú, de 115 megawatts de potencia, entre os municipios de Guitiriz, Vilalba e Xermade (Terra Chá) e Aranga (As Mariñas).
A Dirección Xeral de Calidade e Avaliación Ambiental deu por terminado en xuño de 2023 o procedemento de avaliación ambiental "por non contar con elementos de xuízo suficientes para formular unha declaración de impacto ambiental", polo que acordou arquivar o expediente.
Igualmente, tampouco superou o trámite ambiental o parque da Boibela, con 72 megawatts, entre os concellos do Incio, A Pobra de Brollón, Quiroga, Ribas de Sil, San Xoán de Río e A Pobra de Trives (comarcas de Sarria, Terra de Lemos, Terra de Trives e Quiroga).
O mesmo ocorre co proxecto chamado Cima de Vila, de 54 megawatts, nos municipios pontevedreses de Agolada, Vila de Cruces, Lalín e Silleda (Deza). Contra estas decisións asinadas polo director xeral de Política Enerxética e Minas, Manuel García Hernández, cabe interpor recurso no prazo dun mes.
