Colectivos ecoloxistas advertiron nos últimos días a falta de actividade dos parques eólicos do monte Carrio, arredor de 30 máquinas, entre Vila de Cruces e Lalín, e os do monte do Couto de San Sebastián, entre Silleda e A Estrada. "Están parados e con todas as máquinas freadas, a pesar da especial aptitude eólica destas áreas", explican nun comunicado.
Por este motivo, a asociación ambiental Petón do Lobo mais Cova Crea interpelan á Consellaría de Industria e á Asociación Eólica da Galiza para coñecer as razóns que levaron os parques a deter a súa actividade.
Varios días sen funcionar
"Chama a atención que nunha semana cos prezos da luz á alza, os parques eólicos do monte Carrio, polo menos os das compañías Gamesa e Ibedrola, leven sen funcionar varios días", salientan, o mesmo que os eólicos do monte do Couto de San Sebastián.
Neste sentido, entenden que a cidadanía debe coñecer se se trata dunha parada programada das compañías, "ademais dos motivos polos que se realiza e se hai convenio ou concerto entre as empresas mercantís dos parques afectados para que isto ocorra".
O negocio enerxético está por diante da sostibilidade
Os colectivos en defensa do medio natural urxen explicacións por parte do conselleiro Francisco Conde e instan á Administración á apertura dunha investigación.
"Puidera darse o caso de que instalacións renovábeis con recurso dispoñíbel, gratuíto e non contaminante como é o vento, non estean funcionando, de forma que isto xere un incremento do prezo da electricidade ás familias galegas, o que demostraría, unha vez máis, que o negocio enerxético está por diante da sostibilidade", reflexionan, "e que as empresas enerxéticas carecen da responsabilidade social corporativa da que fixeron tanta publicidade durante a campaña de Nadal".
As paradas programadas dos parques eólicos con fins lucrativos deberan sancionarse duramente
As asociacións ambientalistas piden ás enerxéticas que sexan conscientes da gratuidade do vento e da paisaxe, dous recursos que están a "usucapir no seu propio beneficio", polo que as paradas programadas dos parques eólicos con fins lucrativos, recalcan, "deberan sancionarse duramente".
Por último, reclaman á Xunta a retirada da cualificación de utilidade pública daqueles parques eólicos que non cumpran coas regras da libre competencia e programen paradas eólicas que "alteren á alza os prezos da luz para as familias galegas".