O modelo enerxético para frear o cambio climático, a debate no Consello da Cultura Galega

O sistema enerxético actual, aínda dependente de combustíbeis fósiles, e o cuestionado modelo de implantación de renovábeis foi o foco de atención das xornadas A cuestión enerxética en Galicia: entre economía, territorio e sociedade, que comezaron esta cuarta feira, e continuarán esta quinta feira, organizadas polo Consello da Cultura Galega. Abriu a iniciativa a economista da USC, Rosa Regueiro, para dar unha visión xeral da situación da situación enerxética no Estado español e na Galiza coa introdución das enerxía renovábeis. “As renovábeis non teñen un impacto cero na contorna, só hai que preguntarlles ás comunidades de montes”, asegurou. Por este motivo, defendeu a necesidade de pór límites económicos, técnicos e territoriais “aproveitando experiencias como a de Dinamarca, onde existen solares eólicos que contan cunha remuneración especial”. Na súa intervención, ademais, trasladou os datos da Xunta da Galiza que demostran que “aínda temos dependencia da exportación, seguimos consumindo máis do que exportamos”. Nunha segunda conferencia, a cargo do investigador e economista da UVigo, Xavier Labandeira, a temática continuou centrándose máis nas consecuencias e posíbeis intervencións para frear o cambio climático. “A situación é máis grave do que se pensaba e hai que tomar decisións complexas”, asegurou durante a súa intervención, “os científicos comprobaron que unha vez chegados a determinados límites xa non se poderá controlar”. A Xustiza desautoriza á Xunta e paraliza seis novos parques eólicos Labandeira coincidiu en sinalar ao combustíbel fósil, “que representa 80% do que consumimos” como “o causante do problema”. Ante isto, a súa proposta parte da idea de empregar “incentivos” para aumentar a presenza de renovábeis e contar cunha fiscalidade que “reflicta os custos que se están asumindo agora”. Nesta liña considera “imprescindíbel” unha suba de impostos “sobre todo ao sector da mobilidade”. Aspectos socioeconómicos do modelo galego Tras a primeira sesión, pola tarde tratáronse nunha mesa redonda os aspectos socioeconómicos do modelo enerxético galego. Nela, o sindicalista da CIG e membro do Colectivo Bidán, Francisco da Silva, quixo desmentir “os embustes” sobre a situación na Galiza do que acontece co eólico “como se fose algo exclusivo de aquí a protesta social actual”. Ademais, centrouse na situación da electricidade. “Temos abondo para nós, sobre todo polo baixón da demanda en relación co resto do Estado español”, asegurou, “polo que propomos unha planificación a partir dunha empresa pública enerxética”, engadiu. Para Da Silva é fundamental “contar cun plan social neste momento de transición”. Na mesa tamén participou o economista da UDC, Fernando del Llano. Este investigador coincidiu en que estamos “nun cambio de paradigma”. Lembrou que na Galiza “transformamos 10% da enerxía do Estado e producimos en torno a 10% da electricidade xerada a nivel estatal e somos excedentarios, xa que precisamos en torno a 60% da que producimos”. Por este motivo entendeu que se podería cuestionar “se non sería interesante aproveitar este feito diferencial e incrementar a demanda de electricidade a nivel industrial”. Entre as chave para o futuro, apostou por “activar a demanda eléctrica no sector transporte e industria para aproveitar e despregar os investimentos derivados do aproveitamento do hidróxeno verde”. Por último, entre outras iniciativas, creu positivo “activar medidas para a retención de rendas derivada da xeración eléctrica con sede social na Galiza”. A entidade Rapa das Bestas urxe a declaración BIC para protexer Sabucedo da eólica Outra das intervencións foi a do director do Observatorio Eólico da Galiza (OEGA), Xavier Simón. "Hai que mudar o modelo enerxético e económico, se non o facemos non se resolve o problema", considerou na súa participación. Neste sentido, sinalou que "hai que afastarse do economicismo dominante para introducir aspectos máis sociais e ambientais". En todo caso, rexeita a idea de que sexa só "mudar unha enerxía por outra senón mudar os lentes con que se deseñan os procesos de produción e de consumo". Na mesa de debate tamén tiveron voz as comunidades de montes e a súa visión sobre o que viven coa proliferación de parques eólicos. Neste caso interveu na xornada do Consello da Cultura Galega a presidenta da entidade comunal de Antas-A Lama e coordinadora da oposición ao proxecto eólico do Monte Peón, na Lama (comarca de Pontevedra), Erundina Louro. "Nós estamos na primeira liña de afectación para xustificar que todo vale na política enerxética", afirmou, "cando o que fan é expulsarnos das nosas casas", engadiu. Durante a súa participación rexeitou que se lles considere "insolidarias ou negacionistas", cando o único que procuran, asegura, é "evitar que se repitan erros do pasado que rematen por converter determinados lugares en zonas de sacrificio".