Cales son as claves do novo índice de prezos de referencia para limitar os prezos do aluguer en zonas tensionadas?

O secretario de Estado de Vivenda e Axenda Urbana, David Lucas, anunciou esta terza feira que o índice de prezos de referencia para limitar os prezos do aluguer en áreas tensionadas, dispoñíbel desde esta terza feira, será un sistema de rango de prezos, que estabelecerá os custos máximos e mínimos para unha vivenda en arrendamento segundo as súas características. Ademais, esta ferramenta será homoxénea para todo o territorio estatal e actualizarase cada ano, segundo indicou Lucas. O índice de prezos de referencia para o aluguer terá en conta características da vivendas como a superficie, o estado de conservación, se ten ascensor ou non, a dispoñibilidade de aparcadoiro, o ano de construción ou as zonas comúns, así como outras cuestións. Esta clasificación ten como obxectivo que as vivendas "con menos valor" non poidan incrementar o seu prezo ao ser equiparadas con vivendas de maior calidade na mesma zona. Ademais, o secretario de Estado explicou que este índice é de base tributaria, polo que se empregou a última declaración da renda das distintas propietarias, que no caso deste ano será a de 2022, e que se actualizará cada ano coa última dispoñíbel. A pesar de que o índice está dispoñíbel desde esta terza feira, darase un prazo de dez días hábiles para examinar as propostas que cada autonomía comunique para estabelecer esta ferramenta no seu territorio. Unha vez examinadas e se todo é "correcto", declararanse zonas tensionadas e a partir do prazo legal, de un ou dous días, poderase aplicar o límite do aluguer en cada zona que obteña esta cualificación. As sinaturas de hipotecas sobre vivendas na Galiza baixaron 22% en 2023, o segundo maior descenso no Estado Un índice que "só" se poderá aplicar no caso de que cada autonomía o solicite, xa que estas teñen a competencia en materia de vivenda. Polo de agora, tan só Catalunya pediu declarar zonas tensionadas en 140 municipios. Case 30% dos concellos cumpren os requisitos Segundo o estudo Zonas tensionadas por concellos 2023, publicado polo Observatorio da Vivenda da Galiza, organismo dependente do Instituto Galego de Vivenda e Solo (IGVS), 92 dos 313 concellos da Galiza (29,4%), perto dun terzo dos municipios galegos, cumprirían os requisitos fixados para seren declarados como zonas tensionadas, o que permitiría impor topes ao prezo do aluguer de vivendas. Neste sentido, os Gobernos municipais dalgúns destes concellos, como son os casos das cidades de Compostela, A Coruña ou Pontevedra, xa teñen amosado o seu interese na declaración de zonas tensionadas ou están estudando esta posibilidade. Desta forma, a vicepresidenta segunda da Xunta da Galiza, Ángeles Vázquez, manifestou en decembro que o Goberno galego -tras anunciar en xullo que non empregaría esta figura legal- non poría en marcha "de oficio" o estabelecemento de áreas tensionadas. Con todo, afirmou que o Executivo da Galiza non vai ser un obstáculo para que se poñan en marcha nos concellos que o desexen sempre que o acrediten con datos e criterios técnicos. Neste contexto, a alcaldesa de Compostela, Goretti Sanmartín, asegurou que o departamento de Urbanismo do Concello traballa na documentación precisa para expor as zonas de aluguer tensionadas da capital galega, algo que, insistiu, "se quixese, a Xunta podería facer sen pedir todos eses requirimentos e informes". Na maioría dos casos o índice servirá "só de referencia" do custo do aluguer Cando sexan declaradas as áreas como tensionadas, nas vivendas xa arrendadas, o novo contrato de aluguer "estará referenciado ao contrato anterior", é dicir, conxelarase a renda, unha vez aplicada a cláusula de actualización anual, que en 2024 está limitada a 3%, polo que o prezo só poderá diminuír a partir da negociación entre arrendadora e arrendataria e o índice funcionará "só de referencia" para coñecer o valor real da vivenda en aluguer. Os altos alugueres expulsan as persoas maiores do centro das cidades: "É evidente a turistificación" Porén, se a vivenda é dunha gran propietaria -que teña máis de 10 vivendas ou cinco na mesma área tensionada, segundo o estabelecido por cada autonomía, xa sexa persoa física ou xurídica-, o prezo do novo contrato non só terá en conta o contrato anterior, senón que se fará a referencia co sistema de prezos de aluguer e se terá en conta o custo menor, polo que neste caso si que se poderá minguar a renda segundo o índice publicado esta terza feira polo Ministerio. Así mesmo, naquelas vivendas que non estivesen arrendadas nos últimos cinco anos e que se vaian alugar nunha das zonas que sexan declaradas como tensionadas tamén será de referencia o índice. Ademais, o prezo das vivendas poderá aumentar se son melloradas, se teñen rehabilitación enerxética ou se cumpren unhas condicións de duración do contrato de arrendamentos superiores ao contemplado na normativa. IVE da electricidade O ministro de Economía, Comercio e Empresa do Estado español, Carlos Cuerpo, corroborou esta terza feira que o Imposto sobre o Valor Engadido (IVE) da electricidade volverá a 21% se o prezo medio nas poxas de febreiro non supera os 45 euros por megawatt. Como é a nova reforma do mercado eléctrico a UE? Cal é a medida clave e cando entrará en vigor? A suba do IVE da electricidade suporá unha alza de 15% no prezo A media provisional de febreiro sitúase agora mesmo en 41,25 euros por megawatt, polo que case con toda probabilidade se fará efectiva unha suba deste tributo. Desta maneira, e segundo os cálculos do sector, o incremento do IVE suporía para a factura dunha usuaria media unha alza anual de 15%, pasando de 467 euros a 539 euros a cantidade a pagar. O permiso por paternidade poderá adiantarse O Consello de Ministros e Ministras do Estado español aprobou esta terza feira o proxecto de Lei de Familias coa redacción orixinal da ex responsábel de Asuntos Sociais, Ione Belarra, aínda que coa previsión de introducir cambios no Congreso, como o de manter a denominación 'familias numerosas', que desaparece deste texto. A norma, que recoñece a diversidade das diferentes situacións familiares e que busca mellorar a protección social das mesmas, tramitarase por vía de urxencia na Cámara Baixa e inclúe entre as principais novidades que o pai ou a nai non xestante poderá anticipar o permiso de 16 semanas, colléndoo nos dez días previos á data de parto. Cambios nas bolsas O Consello de Ministros e Ministras aprobou esta terza feira o real decreto polo que se estabelecen os limiares de renda e patrimonio familiar e as contías das bolsas e axudas ao estudo para o curso 2024-2025. O decreto inclúe por primeira vez menores vítimas de abuso sexual e reduce de 33% a 25% o grao de discapacidade para acollerse ás bolsas destinadas a este colectivo. O orzamento co que se dota esta convocatoria de axudas é o mesmo que o do ano 2023. Así, o custo estimado será de 2.535 millóns de euros con cargo ás contas dos anos 2024 e 2025.