As axudas para polígonos industriais discriminan os Concellos que non seguen a política fiscal da Xunta
A convocatoria de axudas da Xunta da Galiza para o desenvolvemento de melloras en infraestruturas de polígonos industriais, dotada con 2,1 millóns de euros de orzamento, estará aberta até o próximo 2 de febreiro.
Porén, estas axudas non están exentas de polémica, pois moitos Concellos denuncian que son discriminados e que se ve cernada a súa autonomía fiscal. O motivo é que terán prioridade para acceder a estas axudas os municipios adheridos á iniciativa 'Concello emprendedor'.
Así, os Concellos que aceptan as condicións do programa 'Concello Emprendedor' -entre as que se atopan varias rebaixas de impostos locais-, teñen prioridade na obtención de fondos para cubrir até 80% do custo de actuacións -cun límite máximo de 120.000 euros- en polígonos industriais do termo municipal.
Entre as condicións para ser considerado pola Xunta da Galiza como 'Concello Emprendedor', están a de "estabelecer bonificacións aos prezos das parcelas do solo empresarial de titularidade municipal" e a de "modificar ordenanzas fiscais reguladoras do imposto sobre bens inmóbeis, do imposto sobre actividades económicas e, de ser o caso, do imposto sobre construcións, instalacións e obras" para favorecer con rebaixas fiscais obrigadas ás empresas dos polígonos con porcentaxes mínimas de até 80%.
Trátase dunha convocatoria de concorrencia competitiva -mais con prioridade para aqueles adheridos á iniciativa 'Concellos Emprendedores'- á que poden optar os municipios que desexen levar a cabo actuacións de iluminación eficiente, depuración de augas, xestión de residuos, seguridade ou infraestruturas viarias nos polígonos industriais.
O BNG ve "discriminación"
Durante o proceso de tramitación do proxecto de Lei de Áreas Empresariais no que se sustentan estas axudas, a deputada do BNG Alexandra Fernández sinalou que esta prioridade “non só é unha chantaxe aos Concellos senón que as propias empresas veríanse afectadas á hora de solicitar subvencións, xa que dependerían de se estas están localizadas nun 'Concello Emprendedor' que ten rebaixas fiscais ou non".
A Xunta "penaliza ás empresas que se atopen nun Concello que non queira ou non precise aplicar rebaixas fiscais”, advertiu, para subliñar a continuación que "o único modelo que o PP fomenta así é o da baixada de impostos sen criterios económicos".
