A presenza galega no Campionato de España Sub-18 de pista cuberta, realizado en Salamanca (Castela e León), resolveuse con tres medallas e sete finalistas.
Foron, en concreto, as probas de medio fondo e fondo as que deron un maior rendemento e, novamente, a dos 3.000 resultou determinante.
A actuación máis salientábel correspondería á atleta lucense Xela Martínez, sen rivais nesa categoría, ao proclamarse campioa de España cunha diferenza de vinte segundos e un crono oficial de 9:39.58.
Teo de Frutos
Outra das medallas colleitadas foi a do tamén lucense Teo de Frutos, quen conseguía entrar na liña de meta na terceira posición cun rexistro oficial de 8:39.19.
O trío destacado de lucenses foi completado por Miguel Alvariño, da Escola Atlética, que remataba nun excelente cuarto posto na final con 8:43.68.
Por último, tamén resultou moi notábel o campionato desenvolto polo coruñés Daniel Salgueiro, quen, logo de acceder á final por tempos, lograba un excelente bronce cun tempo de 1:54.86 (MMP) no seu primeiro ano como Sub18.
