O Real Club Celta deu a coñecer esta sexta feira as e os integrantes do novo Consello de Administración que presidirá Marián Mouriño, cuxo nomeamento será sometido a votación na Xunta Xeral de Accionistas convocada para o 12 de decembro, terza feira, no Salón Rexio da Sede da entidade olívica. Nese momento farase efectiva a remuda nun clube que durante os últimos 17 anos presidiu Carlos Mouriño.
O novo Consello incorpora un maior número de conselleiros independentes, entre os que destaca especialmente o ex porteiro celeste Sergio Álvarez e dos que o propio Celta destaca que son "profesionais, empresarios e deportistas cunha longa traxectoria profesional e empresarial nos seus respectivos ámbitos" e que "achegarán a súa experiencia e a súa visión para fortalecer a gobernanza corporativa do Real Club Celta".
Os integrantes do consello que votará a Xunta de Accionistas son os seguintes:
– Sergio Álvarez. Ex gardameta celeste e cofundador da Escola de Porteiros Sergio Álvarez, da Fundación Celta.
– Antón Álvarez. Senior Advisor de Evercom, axencia creativa de márketing e comunicación; Trascendent, consultora estratéxica de sustentabilidade e impacto, e Unlimited Spain, aceleradora de startups de impacto.
– Carmela Cuevas. Responsábel de Control de Xestión Comercial Zara–Inditex e Business Angel en Velca.
– José Manuel Amoedo. Socio fundador do bufete Amoedo & Lago Avogados e socio titular en Pontevedra do despacho colectivo Eurix Avogados AIE.
– José Álvarez. Socio fundador e CEO de Grupo Femxa Formación e Emprego e socio fundador de Ideaspropias Editorial, Ideaspropias Publicidade, Activa Formación, Adquiro Servizos Integrados, Nred Solucións Formativas, Femxa Formación, Green Venture Labs, Apunto 21, Learning and Support Services, FollowUP & Control e Green Smart Ventures.
– Xisela Aranda. Ex futbolista e ex campioa da Galiza e o Estado español de squash.
– Miguel Álvarez. Socio Director de Marcapital Ventures, empresa que inviste en startups tecnolóxicas en finanzas, alimentación, mobilidade eléctrica e deporte; socio fundador e administrador de Norfood, S.L.; investidor, conselleiro, interim manager e mentor en dez startups; conselleiro, membro do Comité de Dirección e responsábel de Estratexia en BMC Estudo & Contract.
