Un futbolista do CD Lugo encóntrase na UCI após sufrir unha agresión

O 061-Urxencias Sanitarias enviou ao lugar unha ambulancia de soporte vital avanzado para atender ao novo futbolista e trasladalo, posteriormente, ao HULA, onde ingresou na UCI e presenta unha "evolución favorábel", segundo destaca nun comunicado o club de fútbol.
Ambulancia do 061. (Foto: Nós Diario)
photo_camera Ambulancia do 061 (Foto: Nós Diario)

Gonzalo Cuéllar, un xogador de 18 anos do equipo Xuvenil División de Honra do Club Deportivo Lugo, atópase na unidade de coidados intensivos (UCI) do Hospital Universitario Lucus Augusti (HULA) tras sufrir unha agresión na madrugada do sábado ao domingo.

Segundo informan fontes próximas ao acontecido, houbo unha chamada sobre as 6.25 horas da mañá do domingo para solicitar asistencia por este episodio ocorrido na contorna das rúas Clérigos e Fernando de Casas Novoa.

O 061-Urxencias Sanitarias enviou ao lugar unha ambulancia de soporte vital avanzado para atender ao novo futbolista e trasladalo, posteriormente, ao HULA, onde ingresou na UCI e presenta unha "evolución favorábel", segundo destaca nun comunicado o club de fútbol.

Gonzalo Cuéllar é irmán do xogador do CD Lugo Jaume Cuéllar. Tras este suceso, o conxunto lucense envía todo o seu "apoio e forza" á vítima e á familia: "O club atópase xunto a eles e en contacto constante".

"A familia 'albivermella' únese para arroupar Gonzalo, Jaume e á súa familia neste complicado momento e condena enerxicamente, como non podía ser doutra maneira, este terríbel suceso", conclúe o Lugo.

A familia presentou denuncia ao longo da xornada do domingo ante a Policía Nacional, que mantén aberta unha investigación para esclarecer os feitos.

Declaracións de testemuñas

O delegado do Goberno español na Galiza, José Ramón Gómez Besteiro, confirmou que as Forzas e Corpos de Seguridade do Estado están a tomar declaración a testemuñas da agresión.

A preguntas dos xornalistas, nun acto na citada cidade, lembrou que ao xogador non se lle puido tomar declaración xa que se está á espera de que saia da unidade de coidados intensivos (UCI) onde está ingresado.

Comentarios