En Ferrol comezan a pensar que o ascenso de categoría é algo máis que unha posibilidade. O Racing aproveitou ben a súa viaxe até Ceuta para levarse o partido (0-2) e continuar como líder de Primeira RFEF, agora en solitario con tres puntos de diferenza con respecto ao Córdoba. Sete vitorias en oito xornadas e tres partidos seguidos sen encaixar un gol fan que adestrador ferrolán amosara ao remate do encontro a súa ledicia polo resultado e polo equipo.
A incógnita da fin de semana en Primeira RFEF estaba en Riazor e en como reaccionaría o Dépor coa chegada de Óscar Cano. O resultado non podía ser mellor para os herculinos ao colleitar unha vitoria por 2-1 diante dun Linares que chegaba invicto á Coruña. Mais non só foi o resultado, que mantén ao club galego quinto na clasificación e na loita polo ascenso, tamén as sensacións que deixou na afección que hai uns días asubiaba o xogo do seu equipo.
O derbi en Pasarón, pola súa parte, entre o Pontevedra e o Celta B rematou en empate (1-1), un resultado que podería enganar se non temos en conta que os xogadores de Antonio Fernández conseguiron igualar o partido a poucos minutos do final. O equipo da cidade do Lérez segue sen facer o seu mellor fútbol e mantén un pé na zona de descenso repetindo outra semana máis, co filial do Celta, o seu posto na clasificación.
Celta e Lugo, sen puntuar
Cunha boa sensación non chega para gañar un partido. O Celta volveu a dar unha boa imaxe diante da Real Sociedade mais sen conseguir resultados ao rematar perdendo por 1-2. Certo é que a semana pasada tiña diante ao Barcelona e esta mesma ao equipo donostiarra que contaba os seus últimos partidos por vitorias. A boa nova é que Iago Aspas reencontrouse co gol, sete esta tempada, na xogada do empate. Faltará ver se Coudet recupera o ánimo do vestiario.
O pesadelo do Lugo continúa. A derrota diante do Málaga na Rosaleda esta fin de semana (3-2) afunde aínda máis ao equipo galego ao perder postos na clasificación e entrar na zona de descenso. Ademais do mal resultado, a sensación de mal xogo deixou nun mal lugar a Hernán Pérez.
Na cidade da muralla xa comezaron a circular voces que piden a dimisión do adestrador como un revulsivo para mellorar esta situación.