Ilusión da afección e dor de cabeza dos adestradores a partes iguais, a Copa do Rei regresa esta cuarta feira para tres dos representantes da Galiza que continúan vivos na competición do KO.
O primeiro en saltar ao céspede para participar na segunda rolda copeira será un Deportivo da Coruña que xa sabe o que é levantar o título até en dúas ocasións (1995, 2002), pero que de forma paralela ao afundimento progresivo do club leva desde 2017 sendo incapaz de superar máis dunha soa eliminatoria, e nesta edición xa o logrou, eliminando non sen dificultades o modestísimo Covadonga asturiano o pasado mes de novembro.
O rival non parece o mellor para conseguir rematar coa súa mala xeira de resultados na Copa do Rei, pois a pesar de xogar ante o seu público no Estadio de Riazor (12 horas) enfronte terá o Club Deportivo Tenerife de Segunda División, un bloque que está situado a só tres puntos da zona do play-off de ascenso á Primeira.
Ademais, os precedentes históricos tampouco son favorábeis para un conxunto branquiazul que só foi quen de derrotar o chicharrero nun dos seus sete enfrontamentos copeiros, que tivo lugar no afastado novembro de 1981 (2-1, con dobrete de José Manuel Traba para o Dépor).
Non obstante, o preparador herculino, Imanol Idiakez, non renuncia á vitoria, e impulsado pola inercia positivo do triunfo da fin de semana contra o filial do Barcelona, o primeiro fóra da casa nun mes, confirmou que o seu obxectivo é "dar unha alegría" aos seareiras e seareiras e que baixo paus é segura a titularidade do veterano Ian Mackay, mais tamén a presenza doutros dos futbolistas menos habituais.
O Arenteiro ten unha cita coa historia
Xa pola tarde, a segunda escuadra do país en competir (16 horas), o Arenteiro, ten unha cita coa historia en Espiñedo, onte terá a oportunidade de alcanzar a barreira dos dezaseisavos de final por vez primeira.
Non será doado, pois diante estará un equipo de categoría superior como é o Burgos de Segunda División. Porén, a formación castelá baixa enormemente as súas prestacións lonxe do Plantío -dos seus 25 puntos só logrou catro a domicilio-, o que unido á solidez que están demostrando nas últimas semanas os do Carballiño e á extraordinaria motivación que exhiben en cada partido copeiro, aumenta significativamente as súas posibilidades de dar o campanazo.
O Lugo buscará unha sorpresa ante o Mirandés
No segundo e último duelo galego-burgalés da xornada, o Lugo-Mirandés, a entidade albivermella protagoniza no Ángel Carro ás 19 horas un choque no que o conxunto local tampouco é favorito -os visitantes militan na Segunda División-, pero onde o bo momento lucense permite soñar cun resultado positivo para os intereses dos da Cidade da Muralla.
