Unha vintena de series de até 12 países compoñen a Sección Oficial do Carballo Interplay
A Sección Oficial de series a competición do Carballo Interplay atrae talento de todo o mundo. Para a XII edición do festival de contidos dixitais, que terá lugar do 24 ao 27 de abril no Mercado de Carballo, foron seleccionadas 20 propostas de até 12 países, "destacando a gran variedade de xénero, estilos e temáticas".
O festival completa así a súa programación e publica o cartel oficial, con nomes como Facu Díaz, Miguel Maldonado ou Ana Polo na parte dos shows, e paneis de debate e reflexión sobre as tendencias na rede.
Canada será o país máis representado no certame galego, con cinco series feitas por creadores e creadoras dese país. A Galiza achegará ao concurso tres propostas, á que se suma unha cuarta procedente do Estado español. Así falamos, así sentimos, unha comedia sobre Nabiza Girl, unha superheroína amante da lingua que amosa que a forma de falar dun pobo é o reflexo da personalidade dos seus habitantes, dirixida por Virginia Curiá e Tomás Conde; E logo, quen foi?, unha microserie de ficción de xénero policial dirixida por Teresa Barbena, e A moza que abortou e o contou, gañadora de Mellor Proxecto en 2023, un falso documental de Eire Cid e Rosalía Quiroga, que volven ao Carballo Interplay, son as tres propostas galegas. Ademais, tamén chegarán a Carballo proxectos dos Estados Unidos, Irán, Reino Unido, Chile, Portugal, Alemaña, Puerto Rico, Australia, Francia e Austria
As proxecións dividiranse en bloques para poder gozar delas ao longo do festival. O Xurado Oficial do certame determinará as gañadoras, que se anunciarán no Mercado de Carballo o domingo 27 ás 12.30 horas, nunha pequena gala presentada por Belén Puime e Miguel Canalejo.
O Xurado Oficial está composto por Bob Pop, crítico televisivo, director de televisión e teatro e guionista; Albanta San Román, actriz, escritora e creadora de contido e Jorge Boquete, director galego que asina proxectos como Peter Brandon, El método sueco ou a recente A arte de ser (mal) pai. Entregará o premio á Mellor Serie –de 800 euros e trofeo– e á Mellor Dirección –con 200 euros e trofeo–.
O Xurado Novo, que entregará un premio de 400 euros e trofeo, está formado pola xornalista Celia Eiras, a directora Lara Caeiro e a cineasta Antía Rodeiro.
Unha ollada cómica á realidade galega
O Carballo Interplay acollerá a estrea de Delirio Sketchs, da directora viguesa Bea Saiáns, a serie gañadora do premio a mellor proxecto de serie na pasada edición do festival. Presentaranse os tres primeiros capítulos coa presenza da súa directora, elenco e equipo da serie. Esta estrea será a quinta feira 24 ás 20 horas.
Os Delirio Sketchs son capítulos cun aire camp e trash de entre dez e quince minutos de duración, cargados de intensidade e humor febril, nos que se abordan desde o surrealismo e o delirio máis intelectualizado diferentes problemáticas que afectan a nosa sociedade. Diferentes xanelas de conflicto representadas por irreverentes sketchs cunha mistura de coreografías, cancións, reportaxes e momentos estelares de “famoseo underground galego” os sketchs funcionan como parte dun todo e son diferentes espellos do caleidoscopio que é a nosa realidade.
Ademáis, o festival de contidos dixitais Carballo Interplay acollerá a preestrea en Galicia da serie musical Mariliendre, do director lucense Javier Ferreiro. A proxección será a sexta 25 de abril ás 20 horas no Mercado de Carballo, con entrada de balde. Contará coa presencia do seu director e da actriz protagonista, Blanca Martínez.
