'Así falamos, así sentimos': a superheroína Nabiza Girl dá o salto á animación nas redes sociais

Unha superheroína propia do país que, ademais, homenaxease as mulleres do rural e o seu traballo e implicación como piares fundamentais do desenvolvemento social e cultural da Galiza. Así naceu Nabiza Girl, a creación de Isabel Risco que, partindo dunha personaxe teatral, vai ampliando o seu campo de acción a outros territorios artísticos. Agora, Nabiza Girl entra no campo da animación stop motion cunha serie, Así falamos, así sentimos, que arrinca a súa emisión en diferentes redes sociais esta mesma semana. Lanzada pola produtora coruñesa Algarabía Animación e apoiada pola área de Cultura da Deputación da Coruña a través das súas axudas á produción de proxectos singulares de especial interese, a superheroína creada e interpretada por Risco entra no campo audiovisual tras unha longa traxectoria nos escenarios e despois da publicación en 2023 de Operación Breogán, un fanzine publicado por Demo Editora, asinado pola propia actriz xunto ao ilustrador Manel Cráneo e o guionista Carlos Ares e cuxo lanzamento coordinou Marta Horjales. Este grupo creativo volve unirse neste 2024 para sumar o seu talento ao de Algarabía Animación, produtora encabezada por Tomás Conde e Virginia Curiá. Así, Ares asume a coordinación de guión xunto a Risco —quen tamén lle pon a voz a Nabiza Girl—, Manel Cráneo encárgase da dirección de arte e Marta Horjales desenvolve funcións de coordinación. Cómpre destacar tamén que o grupo coruñés Tiruleque lle pon a música á serie e que Laura Blanco Caramés é a responsábel dos decorados e mais do atrezzo. Isabel Risco, en conversa con Nós Diario, non aforra eloxios para o traballo de Virginia Curiá e Tomás Conde. "Afeitos como estamos a que todo o faga a tecnoloxía, pode parecer que detrás dos movementos dos bonecos hai algunha tecnoloxía de última xeración, pero non, é todo traballo manual executado cunha incríbel pericia", declara. A serie, que nace co obxectivo de reforzar a identidade galega entre a mocidade, cun ton natural e desenfadado, difundirase a través das ferramentas comunicativas máis empregadas polas novas xeracións: as redes sociais. Deste xeito, Así falamos, así sentimos poderase seguir a través de Instagram e Tiktok. As persoas seguidoras das aventuras de Nabiza Girl recoñeceran a protagonista da serie: unha superheroína autóctona, afeita ao duro traballo rural e independente; cun sentimento innato de liberdade, pero sen perder a pertenza ao colectivo. "Tratamos de que a serie inclúa non só a Nabiza Girl, senón tamén todo o seu imaxinario, que é o imaxinario colectivo da Galiza. Aí teñen moita importancia os detalles, que están ao cargo da dirección artística de Manel Cráneo. Hai pormenores que retratan un mundo, desde a marca do sulfato, o porquiño que é de raza celta, os petróglifos que aparecen gravados nun petouto que, aparentemente, só serve de decorado. Pero o conxunto acaba por poñer en valor a nosa cultura e o noso patrimonio. O mundo de Nabiza Girl non é outro que o do noso país", explica Risco. A protagonista ocupa, ademais, un espazo tradicionalmente monopolizado por personaxes masculinos que non dubidan en amosar a súa bravura, a súa valentía e mais a súa forza para converterse en auténticos referentes. Entre os superpoderes que ten Nabiza Girl destacan a afouteza, unha conciencia inequívoca sobre a identidade galega e o manexo do humor que adoita ser o motor do traballo de Isabel Risco. "O humor segue sendo unha das grandes ferramentas de defensa que ten o pobo e que tamén debemos poñer en valor, aínda que creo que xa o facemos de forma inconsciente. Na Galiza temos un humor intelixente, moi baseado na ironía, na retranca, nos dobres sentidos... E ao mesmo tempo é respectuoso, non é ferinte, xa que o primeiro do que nos rimos é de nós propios". Nabiza Girl é agora protagonista dun cómic de aventuras A forza expresiva do galego Así falamos, así sentimos está dirixida ao público familiar e adolescente co obxectivo de motivalo para usar o galego. Con esa meta, os diferentes episodios poñen o foco principalmente nun aspecto concreto da situación idiomática na Galiza: a influencia que ten o galego sobre o castelán falado. Así, a serie xoga a inverter unha perspectiva frecuente do debate lingüístico -que adoita xirar habitualmente sobre a pegada do castelán sobre a nosa fala- para chamar á reflexión e pór en valor a potencia expresiva do galego, mesmo en ámbitos que adoitan serlle hostil. Unha mostra deste enfoque atópase xa nos títulos de cada episodio, bautizados como Reseso, Pota, Esnafrar, Esmagar”, Cheirar ou Refugallo. "Trátase, efectivamente de mostrar que a forza do galego é quen de influír noutras linguas", conta a creadora da superheroína. "Rachar cos tópicos e devolverlle ao galego o poder que ten". O primeiro deles xa está dispoñíbel nas redes e os próximos episodios emitiranse o sábado 16, a terza feira 18, a sexta 22, a segunda 25 e a cuarta 27. "Non existen referentes en galego para as crianzas e para a xente nova, e ese é un dos grandes motores que nos move. A situación pode parecer desesperante, pero temos que movernos e crear eses referentes para que as novas xeracións os asuman como propios". Nese sentido, Risco relata que a etapa final da realización da serie coincidiu co falecemento de Akira Toriyama, creador de series como Dragon Ball, que deixaron unha enorme pegada entre toda unha xeración. "Para nós foron un referente absoluto e a proba está en que aquí esas series só as entendemos en galego, se ves a versión en castelán non o recoñeces. Iso é exportar algo de fóra e convertelo en algo noso, mais nós queremos dar un paso máis alá e fabricar os nosos propios referentes. E estou segura de que somos quen de facelo". Manel Cráneo será o novo director do salón Viñetas desde o Atlántico Unha superheroína irónica e "real" A diferenza dos clásicos superheroes de acción que voan e salvan o mundo, Nabiza Girl é unha personaxe auténtica e real co que todas as persoas lectoras se poden sentir identificadas. "É unha superheroína enfocada desde un punto de vista irónico, no que a retranca e o humor lle dan un carácter moi desenfadado", indica o director artístico Manel Cráneo, que recoñece rexeitar os superheroes habituais. "Eu, que non estou interesado nesa temática, si vexo en Nabiza Girl algo real. Creo o que lle pasa porque o seu contexto é o mesmo que o de todos os galegos e galegas".