As imaxes do Ksado e as lecturas sociais que esconden

As históricas estancias do Museo do Pobo Galego envolven desde esta quinta feira as coleccións gañadora e finalistas da última edición do Premio Luís Ksado de fotografía. A inauguración da exposición, que permanecerá aberta ao público até o 14 de novembro, implica o achegamento de fotografías de autor, que van máis alá da simple imaxe, que invitan a unha reflexión ao fío da historia que contan ao común da cidadanía. 

O leonés José Manuel López Pérez obtivo, co seu equipo audiovisual, a colección que resultou gañadora "Atrapados ás portas de Europa". O xurado destacou este compendio de imaxes entre as demais polo relato visual que se crea sobre “a viaxe das persoas refuxiadas a través das montañas de Bosnia”.  

Ademais, forman parte da exposición as seis coleccións finalistas fornecidas polo ollo clínico de Brais Lorenzo, Javier Atienza, Clemente Bernard, Jesús Caballero, Miguel Gómez Muñiz e Jesús Madriñan. En "Tempos de Pandemia", Lorenzo analiza o momento histórico provocado pola crise sanitaria actual e Atienza escolleu falar do exilio do pobo saharauí a través de "Horizonte de Area". 

Pola súa banda, á convocatoria da Deputación Clemente Bernard achegou "Morrer de soños", un relato visual sobre as persoas desaparecidas na represión. Jesús Caballero postulouse ao recoñecemento coa colección sobre paisaxes en decadencia e abandono

"Estrada descoñecida" e en "Segunda pel" Miguel Gómez Muñiz forneceu unha serie de retratos que vinculan o ámbito profesional e privado das mariscadoras. 

Por último, en "A esmorga" Jesús Madriñán quixo dar visibilidade ao universo da mocidade de festa na madrugada. 

Após a inauguración por parte do presidente do Padroado do Museo do Pobo Galego, Xusto Beramendi; o responsábel da área de Cultura da Deputación da Coruña, Xurxo Couto; e o comisario do premio de Creación Fotográfica, Xurxo Lobato, as portas reais e figuradas quedaron abertas para descubrir a arte que achou acubillo na XV edición do Luís Ksado.

O deputado de Cultura, Xurxo Couto, afirmou: “As fotografías que podemos ver aquí non só narran cada unha un relato propio, senón que tamén son imaxes que conmoven, que inspiran, que promoven a reflexión e que nos permiten coñecer e recoñecérmonos no mundo". O deputado tamén fixo referencia a que o conxunto das coleccións "compoñen un acervo documental que, a bo seguro, está chamado a formar parte da memoria colectiva do futuro".