O histórico grupo Fuxan os Ventos publica esta Nadal unha panxoliña: Diante da porta, un tema de melodía tradicional recollido polo propio grupo.
A letra da recolleita contaba unicamente coas primeiras estrofas que foron complementadas e adaptadas por Darío Xohán Cabana.
Un agasallo de Nadal que conta cos arranxos de Xoán Fuertes e Moncho Díaz, e coas colaboracións instrumentais de Benxamín Otero (óboe), Miguel Díaz (clarinete), Roi Adrio (percusións) e Simón García (contrabaixo).
A imaxe da cuberta é obra da ilustradora Agus Shuan.
Unha nova achega dunha serie de cancións que o grupo Fuxan os Ventos sacará á luz durante os próximos meses. Algúns destes forman parte da exposición ‘Fuxan os Ventos. 50 anos de historia’ que conmemora o medio século de vida do grupo lugués.
Homenaxe a Moncho Díaz
O pasado mes de marzo Fuxan o Ventos publicaba un tema en homenaxe ao seu membro falecido un mes antes, Moncho Díaz.
O tema, titulado ‘Eu en ti’ que é un poema de Celso Emilio Ferreiro musicado por Xoán Luís Fuertes Saavedra. O grupo continuaba así cun dos seus sinais de identidade: integrar nas letras das súas cancións poemas da literatura galega.
