Airbourne é o nome que temos que engadir á Rose Tatto e AC/DC cando falamos das grandes bandas do hard rock australiano. A banda dos irmáns O’Keeffe chegou para consolidarse con Breakin’ Outta Hell, o que é seu cuarto álbum e que destila festa e rock and roll por cada un dos seus 11 temas.
Airbourne atoparon a chave do éxito: escoita a AC/DC e faino máis duro e máis rápido, liña do que neste traballo non se afastaron un ápice, nin falta que lles fai. Letras sen moita complicación, tirando dos tópicos sexo, alcol e rock and roll, riffs contundentes e unha batería moi marcada configuran este traballo de reafirmación.
Breakin’ Outta Hell fora o single de adianto que nos chegara hai xa uns meses e que é unha auténtica locomotora cun retrouso rompedor que sobe o estado de ánimo nada máis encomezar e que frean con Rivalry, un medio tempo que lembra moito aos Gorky Park e que ten un toque oitenteiro que fai dela unha das mellores cancións do disco. O ritmo volve subir, aínda que non moito, con Get Back Up, un tema tan sinxelo como divertido.
Breakin’ Outta Hell fora o single de adianto que nos chegara hai xa uns meses e que é unha auténtica locomotora
It’s Never Too Loud For Me é un deses himnos ao rock and roll feito para funcionar en tanto en directo, como nos garitos e que é preludio do rock and roll salvaxe que traeThin The Blood, o tema máis salvaxe e frenético deste plástico. I’m Going To Hell For This volve ao máis puro estilo AC/DC tanto no son como en toda construción do tema, dende as síncopas até os coros.
Down On You é unha irreverente e divertida oda ao cunilingus, que entra dende a primeira escoita e que ben podería ser obra do propio Lemmy. Never Been Rocked Like This é un dos temas máis frouxos do disco, que sen chegar a ser malo, rompe coa tónica que levaba até este momento e que volve a retomar coa pegadiza When I Rock I Go Crazy, todo un himno roqueiro a beber.
Encetamos a recta final do disco con Do Me Like You Do Yourself, outro tema sen complicacións cun retrouso no que o título se repite até a saciedade para que a xente a cante nos directos xunto coa banda. It’s All For Rock N’ Roll, e o grandioso himno que pecha o disco. Un tema que a banda ten dedicado a Lemmy, co que a banda compartiu xiras.
Letras sen moita complicación, tirando dos tópicos sexo, alcol e rock and roll
Nuns tempos nos que parece que se esqueceu que o rock ten que ser divertido, volven Airbourne para nolo lembrar. Non lles fai falla alardes nin experimentos, non precisan de virtuosismo, porque este é simplemente un disco de rock and roll, feito para o pasar ben en calquera momento e en calquera lugar.
Listaxe de temas
- Breakin’ Outta Hell
- Rivalry
- Get Back Up
- It’s Never Too Loud for Me
- Thin the Blood
- I’m Going to Hell for This
- Down on You
- Never Been Rocked Like This
- When I Drink I Go Crazy
- Do Me Like You Do Yourself
- It’s All for Rock N’ Roll
AIRBOURNE NAS REDES
Web: http://airbournerock.com/
Facebook: https://www.facebook.com/airbournerock
Twitter: @airbourne